रवि लामिछाने र अमित शाहबीच भेटवार्ता, नेपाल–भारत सम्बन्ध र सहकार्यबारे गहन छलफल

काठमाडौं । भारत भ्रमणमा रहेका राष्ट्रिय स्वतन्त्र पार्टी (रास्वपा) का सभापति रवि लामिछाने र भारतका गृहमन्त्री अमित शाहबीच नयाँदिल्लीमा उच्चस्तरीय भेटवार्ता भएको छ।

मंगलबार साँझ भएको भेटमा नेपाल–भारत द्विपक्षीय सम्बन्ध, आपसी हितका विषय, लोकतान्त्रिक अभ्यासको आदान–प्रदान, सुरक्षा सहकार्य तथा दुई देशका राजनीतिक दलहरूबीचको संवाद र सहकार्यलाई अझ प्रभावकारी बनाउने विषयमा विस्तृत छलफल भएको जनाइएको छ।

रास्वपाका सभापति लामिछाने नेतृत्वको प्रतिनिधिमण्डलले भारत भ्रमणका क्रममा भारतीय राजनीतिक नेतृत्वसँग महत्वपूर्ण भेटघाटलाई निरन्तरता दिएको छ। यसअघि मंगलबार नै उनले भारतीय जनता पार्टी (भाजपा) का अध्यक्ष नितिन नवीन तथा भारतका विदेशमन्त्री एस जयशंकरसँग पनि छुट्टाछुट्टै भेटवार्ता गरेका थिए।

भेटघाटहरूलाई नेपाल–भारत सम्बन्धलाई नयाँ उचाइमा पुर्‍याउने तथा क्षेत्रीय सहकार्यका सम्भावनाबारे विचार आदान–प्रदान गर्ने अवसरका रूपमा हेरिएको छ। रास्वपाले पनि भ्रमणलाई दुई देशबीचको राजनीतिक तथा कूटनीतिक सम्बन्ध सुदृढ बनाउने प्रयासका रूपमा व्याख्या गरेको छ।

लामिछाने सोमबार पाँचदिने भारत भ्रमणका लागि नयाँदिल्ली प्रस्थान गरेका हुन्। भ्रमणका क्रममा भारतीय राजनीतिक नेतृत्वसँग थप भेटघाट तथा विभिन्न कार्यक्रमहरूमा सहभागी हुने कार्यतालिका रहेको बताइएको छ।

Facebook Comments Box