ठगी प्रकरणमा अनुसन्धान तीव्र, सामाजिक सञ्जालमार्फत प्रहरीमाथि आरोप लगाउँदै तुलसा अधिकारी

काठमाडौं । सामाजिक सञ्जाल टिकटकमार्फत चर्चामा आएकी तुलसा अधिकारीविरुद्ध दर्ता भएको ठगी प्रकरणको अनुसन्धान तीव्र बन्दै गएको छ। यसबीच अधिकारीले टिकटकमार्फत सार्वजनिक अभिव्यक्ति दिँदै अनुसन्धान प्रक्रियामाथि प्रश्न उठाउन थालेपछि विषय थप चर्चामा आएको छ।

ललितपुरको सातदोबाटोस्थित अटोमोबाइल व्यवसायी कुमार चिमोरियाले दिएको जाहेरीका आधारमा तुलसा अधिकारीविरुद्ध ठगी सम्बन्धी मुद्दा दर्ता भएको हो। सोही जाहेरीपछि प्रहरीले अधिकारीविरुद्ध पक्राउ पुर्जी जारी गरी अनुसन्धान अगाडि बढाएको छ।

हाल चीनमा रहेको बताइएकी अधिकारीले सामाजिक सञ्जालमार्फत आफूविरुद्धको अनुसन्धान अन्यायपूर्ण रहेको दाबी गर्दै विभिन्न अभिव्यक्ति सार्वजनिक गरिरहेकी छन्। उनले सातदोबाटो प्रहरी वृत्तकी प्रमुख डिएसपी पूर्णिमा चन्दको नामसमेत जोडेर आरोप लगाएकी छन्।

यता प्रहरी स्रोतका अनुसार डिएसपी चन्द अनुसन्धान अधिकृतको भूमिकामा रहेकाले घटनासँग सम्बन्धित प्रमाण संकलन, सम्बन्धित पक्षसँग सोधपुछ तथा आवश्यक अनुसन्धान प्रक्रिया अघि बढाउनु उनको नियमित जिम्मेवारीभित्र पर्ने विषय हो। अनुसन्धानका क्रममा कुनै स्थानमा पुग्नु वा सम्बन्धित व्यक्तिसँग सम्पर्क गर्नु कानुनी प्रक्रियाको सामान्य हिस्सा भएको प्रहरीको भनाइ छ।

अधिकारीले सामाजिक सञ्जालमा डिएसपी चन्दमाथि व्यक्तिगत आरोप लगाउँदै आफ्नै पसलबाट सामान खरिदका क्रममा विवाद भएको दाबी गरेकी छन्। तर प्रहरी पक्षले यस्ता आरोप अनुसन्धानसँग असम्बन्धित रहेको र सामाजिक सञ्जालमार्फत सार्वजनिक रूपमा उठाइएका विषयको सत्यता कानुनी प्रक्रियाबाटै पुष्टि हुनुपर्ने बताएको छ।

प्रहरीका अनुसार तुलसा अधिकारीविरुद्ध ठगीसँगै सम्पत्ति शुद्धीकरणसम्बन्धी कसुरमा समेत अनुसन्धान भइरहेको छ। यसअघि नै जाहेरी दर्ता भइसकेको र अनुसन्धान प्रक्रिया कानुनबमोजिम अगाडि बढिरहेको ललितपुर प्रहरीले जनाएको छ।

कानुनविद्हरूका अनुसार कुनै पनि व्यक्तिमाथि लागेको आरोप वा प्रत्यारोप सामाजिक सञ्जालको बहसबाट नभई प्रमाण, तथ्य र न्यायिक प्रक्रियाका आधारमा टुंगिनुपर्छ। अनुसन्धान जारी रहेको अवस्थामा सम्बन्धित पक्षहरूले कानुनी प्रक्रियालाई सहयोग गर्नु नै उपयुक्त हुने उनीहरूको धारणा छ।

पछिल्लो समय सामाजिक सञ्जालमा सार्वजनिक भइरहेका आरोप–प्रत्यारोपका कारण यो प्रकरण थप चर्चामा रहे पनि यसको अन्तिम सत्यता भने अनुसन्धान तथा अदालतको प्रक्रियाबाट मात्र स्थापित हुने देखिन्छ।

Facebook Comments Box