टिकटक स्टार तुलसा अधिकारीविरुद्ध २१ करोडको सम्पत्ति शंका, सम्पत्ति शुद्धीकरण मुद्दा दायर

काठमाडौं । हनी ट्र्यापमार्फत करोडौं रुपैयाँ ठगी गरेको आरोपमा पक्राउ परेकी टिकटक स्टार तुलसा अधिकारीविरुद्ध स्रोत नखुलेको करिब २१ करोड रुपैयाँ बराबरको सम्पत्ति भेटिएको प्रहरी स्रोतले जनाएको छ ।

प्रहरीका अनुसार कुमार चिमोरियाले २०८२ साउन २४ गते ६ करोड ५२ लाख २९ हजार ७५ रुपैयाँ ठगी भएको भन्दै दिएको जाहेरीका आधारमा अधिकारी पक्राउ परेकी हुन् । सोही अनुसन्धानका क्रममा उनको नाममा रहेको भनिएको ठूलो परिमाणको सम्पत्तिको स्रोत पुष्टि हुन नसकेको बताइएको छ ।

अनुसन्धानमा संलग्न अधिकारीहरूका अनुसार उक्त सम्पत्तिको वैध स्रोत खुलाउन नसकेपछि उनीविरुद्ध सम्पत्ति शुद्धीकरणसम्बन्धी मुद्दा समेत अघि बढाइएको छ ।

प्रहरीले प्रारम्भिक अनुसन्धानमै ठूलो रकमको वित्तीय कारोबार र सम्पत्तिको विवरण देखिएको जनाएको छ । तर ती सम्पत्तिको वास्तविक स्रोत के हो भन्ने विषयमा थप अनुसन्धान भइरहेको छ ।

यसैबीच, आरोपित अधिकारीले पनि बयानका क्रममा सम्पत्तिको स्रोतबारे स्पष्ट विवरण दिन नसकेको अनुसन्धान स्रोतले जनाएको छ ।

यदि आरोप पुष्टि भएमा सम्पत्ति शुद्धीकरण तथा ठगीसम्बन्धी कानुनअनुसार कारबाही हुन सक्ने कानुनविद्हरूको भनाइ छ । प्रहरीले भने अनुसन्धान जारी रहेको र अन्तिम निष्कर्ष आउन बाँकी रहेको स्पष्ट पारेको छ ।

Facebook Comments Box