जीवन बीमा आजै गर्न किन आवश्यक? यस्ता छन् मुख्य ६ कारण

सिरुना शर्मा आर्थिक सुरक्षाको बलियो आधार मानिने जीवन बीमा धेरैले “भोलि गरौंला” भन्दै टार्ने गर्छन्। तर विज्ञहरूका अनुसार भविष्यको अनिश्चितता र बदलिँदो परिस्थितिलाई मध्यनजर गर्दा बीमा आजै सुरु गर्नु नै बुद्धिमानी कदम हो। यहाँ छन् तत्कालै जीवन बीमा गर्नुका प्रमुख कारणहरू:
१. स्वास्थ्यको अनिश्चितता
आज पूर्ण रूपमा स्वस्थ देखिएको व्यक्ति भोलि बिरामी वा घाइते हुन सक्छ। एकपटक गम्भीर स्वास्थ्य समस्या देखिएपछि बीमा गर्न कठिन हुन सक्छ, कतिपय अवस्थामा असम्भव पनि। त्यसैले स्वस्थ रहँदाकै अवस्थामा बीमा गरी आफ्नो र परिवारको भविष्य सुरक्षित बनाउनु उपयुक्त हुन्छ।
२. उमेरसँगै बढ्दो बीमाशुल्क
उमेर बढ्दै जाँदा बीमाको प्रिमियम पनि बढ्छ। आज कम उमेरमा बीमा गर्दा सोही रकममा बढी बीमांक (coverage) पाउन सकिन्छ। त्यसैले सस्तो र लाभदायक दरमा बीमा गर्न चाहनेहरूका लागि अहिले नै सही समय हो।
३. आजको बचत, भोलिको सुरक्षा
बीमा खर्च होइन, दीर्घकालीन बचत र सुरक्षाको संयोजन हो। “आज खर्च गरौं, भोलि बीमा गरौं” भन्ने सोचले भविष्यमा आर्थिक असुरक्षा निम्त्याउन सक्छ। आजैबाट बचत सुरु गर्दा भोलिका आवश्यकताहरू सहजै पूरा गर्न सकिन्छ।
४. बीमा योजनाको अनिश्चितता
आज उपलब्ध र उपयुक्त लागेको बीमा योजना सधैं खुला रहने ग्यारेन्टी हुँदैन। नीतिगत परिवर्तन, कम्पनीको रणनीति वा बजारको अवस्थाले योजना बन्द वा परिमार्जित हुन सक्छ। त्यसैले मन परेको र आवश्यकता अनुरूपको योजना आजै रोज्नु बुद्धिमानी हुन्छ।
५. भविष्यमा महँगो हुन सक्ने जोखिम
बीमा बजारमा हुने प्रतिस्पर्धा, नियम परिवर्तन वा अन्य कारणले प्रिमियम दर समयसँगै बढ्न सक्छ। अहिले आम्दानीले धान्ने दरमा बीमा गर्न सकिने अवस्था छ भने ढिला नगर्नु नै फाइदाजनक हुन्छ।
६. प्राथमिकता परिवर्तनको सम्भावना
जीवनका विभिन्न चरणमा आर्थिक प्राथमिकताहरू बदलिन्छन्। भोलि अन्य दायित्व बढेपछि बीमा प्राथमिकताबाट बाहिर पर्न सक्छ। तर आजै सुरु गरिएको बीमा बचतले भविष्यमा ठूलो आर्थिक राहत दिन सक्छ।
तसर्थ :
जीवन बीमा भविष्यको लागि गरिने निर्णय हो, तर सुरु गर्ने उत्तम समय “आज” नै हो। अनिश्चित स्वास्थ्य, बढ्दो उमेर, परिवर्तनशील योजना र आर्थिक प्राथमिकताहरूलाई ध्यानमा राख्दा बीमा ढिला गर्नु जोखिमपूर्ण हुन सक्छ।
आजै सानो कदम चाल्दा भोलिको ठूलो चिन्ता हटाउन सकिन्छ।