चार बालबालिकालाई बाँधेर कुटपिट गरेको आरोपमा चार महिला पक्राउ

बारा । मोबाइल चोरीको आरोप लगाउँदै चारजना बालबालिकालाई सार्वजनिक स्थानमा डोरीले बाँधेर कुटपिट गरेको घटनामा चार महिला पक्राउ परेका छन् ।

जिल्ला प्रहरी कार्यालय बाराका अनुसार जितपुर सिमरा उपमहानगरपालिका–१६ स्थित टांगिया बस्तीमा मंगलबार बिहान करिब ९ बजे उक्त घटना भएको हो । मोबाइल चोरीको आरोप लगाउँदै बालबालिकालाई सार्वजनिक चौतारामा रहेको बरको रुखमा डोरीले बाँधेर कुटपिट गरिएको सूचनापछि प्रहरीले अनुसन्धान थालेको थियो ।

घटनामा संलग्न रहेको आरोपमा स्थानीय ६२ वर्षीया मिना रजन मगर, ३२ वर्षीया पवि कुमारी आले मगर, ३० वर्षीया रानिमाया मोक्तान र ४२ वर्षीया निर्मला वाईलाई पक्राउ गरिएको जिल्ला प्रहरी कार्यालय बाराले जनाएको छ ।

प्रहरीले उनीहरूविरुद्ध बालबालिकासम्बन्धी कसुर अन्तर्गत मुद्दा दर्ता गरेको छ । जिल्ला अदालत बाराबाट पाँच दिनको म्याद थप अनुमति लिएर घटनाबारे थप अनुसन्धान भइरहेको प्रहरी नायब उपरीक्षक (डीएसपी) मिनबहादुर घलेले जानकारी दिए ।

प्रहरीले घटनाबारे थप वस्तुगत अनुसन्धान जारी रहेको जनाएको छ ।

Facebook Comments Box