समाचारको स्रोत खोज्ने नाममा पत्रकारमाथिको धरपकड निन्दनीय ः पूर्ण बस्नेत

जनता समाजवादी पार्टी (जसपा) नेपालका नेता पूर्ण बस्नेतले समाचारको स्रोत खोज्ने नाममा पत्रकारमाथि भएको धरपकड निन्दनीय भएको टिप्पणी गरेका छन् ।
हालै नेपाल प्रेस, नयाँ पत्रिकालगायतका विभिन्न सञ्चारमाध्यमका समाचार कक्षमै प्रहरी प्रवेश गरी पत्रकारहरुलाई पक्राउ गरिएको र धरपकड गरिएको घटनाप्रति गम्भीर आपत्ति जनाउँदै बस्नेतले प्रेस स्वतन्त्रतामाथिको आक्रमण लोकतन्त्रमाथिको आक्रमण भएको भन्दै उक्त कार्यको निन्दा गरेका हुन् ।

बस्नेतले भने, ‘समाचार लेखेकै आधारमा राज्य संयन्त्रबाट भएको यस्तो प्रकारको नियन्त्रण र धरपकड लोकतान्त्रिक मूल्य मान्यता तथा नेपालको संविधानले प्रत्याभूत गरेको ‘पूर्ण प्रेस स्वतन्त्रता’ को ठाडो उल्लङ्घन हो । सञ्चारमाध्यममा प्रकाशित वा प्रसारित समाचारका विषयमा चित्त नबुझेमा कानुनी उपचार खोज्ने स्थापित प्रकिया र निकाय छँदाछँदा प्रहरी परिचालन गरेर सञ्चारगृहमा धावा बोल्ने कार्य निन्दनीय र आपत्तिजनक छ ।’

प्रेस स्वतन्त्रता र जिम्मेवार पत्रकारिता लोकतन्त्रको आधारस्तम्भ भएको भन्दै उनले पत्रकार तथा सञ्चारकर्मीलाई स्वतन्त्र र भयरहित वातावरणमा काम गर्ने वातावरण सुनिश्चित गर्न, प्रेस विरोधी हर्कतहरु बन्द गर्न र प्रेस स्वतन्त्रतको अक्षुण्ण रक्षा गर्न सरकारसँग जोडदार माग गरेका छन् ।

Facebook Comments Box