ललितपुरमा स्कुलभित्र पसेको चितुवा प्रहरीद्वारा नियन्त्रणमा, कुनै मानवीय क्षति भएन

काठमाडौं । ललितपुरस्थित माछापुच्छ्रे स्कुल परिसरमा पसेको चितुवालाई नेपाल प्रहरीले सफलतापूर्वक नियन्त्रणमा लिएको छ।
नेपाल प्रहरीका अब्बल कमाण्डर डिएसपी पूर्णिमा चन्दको कमाण्डमा खटिएको प्रहरी टोलीले उच्च सतर्कता र सक्रियता देखाउँदै चितुवालाई नियन्त्रणमा लिएको हो। चितुवा स्कुल परिसरभित्र प्रवेश गरेपछि विद्यार्थी, शिक्षक तथा स्थानीयमा त्रास फैलिएको थियो।

घटनाबारे जानकारी पाएलगत्तै प्रहरी टोली घटनास्थलमा पुगेको थियो। डिएसपी चन्दको नेतृत्वमा खटिएको प्रहरी टोलीले सुरक्षात्मक उपाय अपनाउँदै चितुवालाई सुरक्षित रूपमा नियन्त्रणमा लिन सफल भएको हो।
प्रहरीको तत्परता र समन्वयका कारण उक्त घटनामा कुनै पनि मानवीय क्षति हुन नपाएको प्रहरीले जनाएको छ। समयमै गरिएको उद्धार तथा नियन्त्रण कार्यले सम्भावित जोखिम टरेको स्थानीयले बताएका छन्।
प्रहरीको सक्रियता र जिम्मेवार भूमिकाको स्थानीयले प्रशंसा गरेका छन्।

Facebook Comments Box