गृहमन्त्री गुरुङको नाममा लघु बीमा कम्पनीमा सेयर रहेको खुलासा, सम्पत्ति विवरणमा नदेखिएको भन्दै प्रश्न

काठमाडौं । विचौलिया दीपक भट्ट समूहसँग सम्बन्धित भनिएको एक लघु बीमा कम्पनीमा गृहमन्त्री सुधन गुरुङको समेत लगानी रहेको खुलासा भएको छ, जसले राजनीतिक र आर्थिक दुवै तहमा नयाँ बहस जन्माएको छ।

सम्पत्ति शुद्धीकरणसम्बन्धी अनुसन्धानका क्रममा प्रहरी हिरासतमा रहेका भट्ट समूहसँग जोडिएको भनिएको स्टार माइक्रो इन्स्योरेन्स कम्पनी लिमिटेड मा गुरुङको २५ लाख रुपैयाँ बराबरको सेयर रहेको सार्वजनिक विवरणमा उल्लेख गरिएको छ। तर उक्त लगानी उनको आधिकारिक सम्पत्ति विवरणमा समावेश नभएको दाबीले थप विवाद उत्पन्न गरेको छ।

उक्त कम्पनीमा शंकर समूह र इन्फिनिटी होल्डिङसँग आबद्ध व्यक्तिहरूको समेत लगानी रहेको बताइएको छ। कम्पनीका अध्यक्ष सुजन आचार्य र सञ्चालक प्रजुनी बज्राचार्यलाई भट्ट समूहसँग निकट मानिने गरिएको छ।

यस प्रकरणमा गृहमन्त्री गुरुङ वा उनको सचिवालयबाट अहिलेसम्म कुनै औपचारिक प्रतिक्रिया आएको छैन, जसले विषयलाई अझ रहस्यमय बनाएको छ।

यता, लघु बीमा कम्पनीहरूको लाइसेन्स वितरण प्रक्रियामै प्रश्न उठ्दै आएको छ। नेपाल बीमा प्राधिकरणले २०७९ पछि ७ वटा लघु बीमा कम्पनीलाई लाइसेन्स दिएको थियो। उक्त निर्णय तत्कालीन अध्यक्ष सूर्य प्रसाद सिलवालको कार्यकालमा भएको हो। सिलवालमाथि ‘सेटिङ’मार्फत सीमित व्यावसायिक समूहलाई फाइदा पुर्‍याइएको आरोप लाग्दै आएको छ, र यसै विषयमा अख्तियार दुरुपयोग अनुसन्धान आयोगले उनीविरुद्ध भ्रष्टाचार मुद्दा दायर गरिसकेको छ।

समग्र घटनाक्रमले सरकारी पदाधिकारीको पारदर्शिता, सम्पत्ति विवरणको विश्वसनीयता तथा नियामक निकायहरूको निष्पक्षतामाथि गम्भीर प्रश्न उठाएको छ।

Facebook Comments Box