सरकारी अस्पतालमा जन्मिने हरेक नवजातलाई १ ग्राम सुनको औंठी दिने तमिलनाडु सरकारको घोषणा

एजेन्सी । भारतको तमिलनाडु सरकारले सरकारी अस्पतालमा जन्मिने प्रत्येक नवजात शिशुलाई १ ग्राम सुनको औंठी उपहार दिने नयाँ कल्याणकारी योजना घोषणा गरेको छ। ‘थाई मामन थंग मोथिरा थित्तम’ (Thaaimaaman Thanga Mothira Thittam) नाम दिइएको यो योजना तमिल संस्कृतिमा मामाले भान्जा–भान्जी जन्मिँदा सुन उपहार दिने परम्परालाई आधार बनाएर ल्याइएको हो।

सरकारका अनुसार यो योजना २२ जुन २०२६ देखि जन्मिने शिशुहरूका लागि लागू हुनेछ। उक्त मिति मुख्यमन्त्री सी. जोसेफ विजयको जन्मदिनसमेत हो। योजनाको औपचारिक शुभारम्भ भने १५ सेप्टेम्बर २०२६ मा पूर्वमुख्यमन्त्री सी.एन. अन्नादुराईको जन्मजयन्तीको अवसरमा गरिने जनाइएको छ।

यस कार्यक्रमका लागि तमिलनाडु सरकारले वार्षिक ७५५.८३ करोड भारु बजेट विनियोजन गरेको छ। यो सुविधा तमिलनाडुका स्थायी बासिन्दा आमाबुबाबाट सरकारी अस्पतालमा जन्मिएका नवजात शिशुले मात्र पाउनेछन्।

सरकारले यस योजनाको मुख्य उद्देश्य मातृ तथा शिशु स्वास्थ्य सुधार गर्नु, सरकारी स्वास्थ्य सेवाप्रति नागरिकको विश्वास बढाउनु तथा सुरक्षित संस्थागत सुत्केरीलाई प्रोत्साहन गर्नु रहेको जनाएको छ।

तमिलनाडु सरकारले परम्परा र सामाजिक कल्याणलाई जोडेर ल्याएको यो योजनाले नवजात शिशु र आमाको स्वास्थ्य सेवामा सकारात्मक प्रभाव पार्ने अपेक्षा गरेको छ।

Facebook Comments Box