लमजुङमा रात्रीकालीन सवारी सञ्चालनमा रोक, मनसुनजन्य जोखिम न्यूनीकरणका लागि निर्णय

लमजुङ । मनसुनजन्य विपद्बाट हुन सक्ने सम्भावित जनधन क्षतिलाई न्यूनीकरण गर्ने उद्देश्यले लमजुङमा रात्रीकालीन समयमा केही प्रमुख सडकखण्डमा सवारी सञ्चालनमा रोक लगाइएको छ ।

जिल्ला सुरक्षा समितिको सोमबार बसेको बैठकले आजदेखि असार मसान्तसम्म अत्यावश्यक बाहेकका सवारीसाधनलाई रात्रीकालीन समयमा सञ्चालन नगर्ने निर्णय गरेको हो ।

सहायक प्रमुख जिल्ला अधिकारी थम्मनसिंह गौतमका अनुसार बेसीसहर–चामे सडकखण्डअन्तर्गत बेसीसहरदेखि मनाङ जिल्लाको सीमानासम्म प्रत्येक दिन साँझ ६ बजेदेखि बिहान ६ बजेसम्म सवारी सञ्चालनमा रोक लगाइएको छ ।

त्यस्तै, पुष्पलाल मध्यपहाडी लोकमार्गको सुन्दरबजार–भोर्लेटार सडकखण्डअन्तर्गत बिमिरे भञ्ज्याङ क्षेत्रमा साँझ ७ बजेदेखि बिहान ५ बजेसम्म सवारी सञ्चालनमा निषेध गरिएको उनले जानकारी दिए ।

प्रशासनका अनुसार अत्यावश्यक सेवा तथा आपतकालीन प्रयोजनका सवारीसाधन भने नियमित रूपमा सञ्चालन गर्न दिइनेछ ।

हालको मौसमी अवस्थालाई मध्यनजर गर्दै सम्भावित भारी वर्षा, पहिरो तथा सडक दुर्घटनाको जोखिमलाई ध्यानमा राखी यो निर्णय गरिएको जिल्ला प्रशासन कार्यालयले जनाएको छ ।

Facebook Comments Box