पुस्तान्तरणको बहस साम्राज्यवादी एजेन्डा हो : प्रचण्ड

काठमाडौं । नेपाली कम्युनिस्ट पार्टी (नेकपा)का संयोजक पुष्पकमल दाहाल ‘प्रचण्ड’ले पुस्तान्तरणको बहसलाई साम्राज्यवादी एजेन्डाको रूपमा व्याख्या गरेका छन्।

सोमबार बसेको पार्टीको केन्द्रीय कमिटीको भर्चुअल बैठकलाई सम्बोधन गर्दै उनले पुस्तान्तरणको विषयलाई अनावश्यक रूपमा उचालिएको दाबी गरेका हुन्। बैठकमा सहभागी एक केन्द्रीय सदस्यका अनुसार प्रचण्डले भने, “पुस्तान्तरण भन्ने कुरा साम्राज्यवादी एजेन्डा हो। साम्राज्यवादीहरूले ल्याएका एजेन्डा हुन्, पुस्तान्तरणको कुरा सही होइन।”

महाधिवेशनको तयारीका लागि आयोजित उक्त बैठकमा प्रचण्डले मुख्य रूपमा तीन विषयमा आफ्नो धारणा राखेका थिए। उनले महाधिवेशनको नियमावली तथा आचारसंहिताको मस्यौदा प्रस्तुत गर्दै केन्द्रीय सदस्यहरूबाट सुझाव मागेका थिए।

त्यसैगरी, नेकपा र एमालेबीचको सम्बन्धबारे स्पष्ट पार्दै उनले हाल एकता नभई सहकार्यको चरणमा रहेको बताएका थिए। “एमालेसँग एकता होइन, सहकार्यको कुरा हो। अहिले सहकार्य गर्ने हो,” उनले बैठकमा बताएका थिए।

प्रचण्डले पार्टीलाई नयाँ ढंगबाट अघि बढाउनुपर्ने आवश्यकता औँल्याउँदै केन्द्रीय सदस्यहरूलाई गाउँ–गाउँमा पुगेर महाधिवेशनको तयारीमा सक्रिय हुन निर्देशन दिएका थिए। “अब नयाँ ढंगले जानुपर्छ। पार्टीलाई नयाँ ढंगले अगाडि लैजानुपर्छ,” भन्दै उनले संगठन विस्तार र जनसम्पर्कलाई प्राथमिकतामा राख्न आग्रह गरेका थिए।

यसैबीच, प्रचण्डले बालेन्द्र नेतृत्वको सरकार धेरै समय टिक्न नसक्ने दाबी पनि गरेका छन्। उनले सरकारका हालसम्मका गतिविधि सन्तोषजनक नरहेको टिप्पणी गर्दै भने, “सरकार ठीक ढंगले गइरहेको छैन। यो सरकार त्यति लामो जाँदैन।”

Facebook Comments Box