उत्तर कोरियाको आणविक शक्ति विस्तार घोषणा, दक्षिण कोरियामाथि सैन्य निगरानी अझ कडा

एजेन्सी । उत्तर कोरियाले आफ्नो आणविक क्षमतालाई गुणात्मक र संख्यात्मक दुवै हिसाबले थप सुदृढ बनाउने घोषणा गर्दै दक्षिण कोरियासँग सम्बन्धित सैन्य तथा गुप्तचर निगरानीलाई अझ विस्तार गर्ने निर्णय गरेको छ।

उत्तर कोरियाको सरकारी सञ्चारमाध्यम कोरियन सेन्ट्रल न्युज एजेन्सी (KCNA) का अनुसार सत्तारुढ वर्कर्स पार्टीको केन्द्रीय सैन्य आयोगको हालै सम्पन्न बैठकमा देशको आणविक क्षमता थप मजबुत बनाउने, रक्षा रणनीतिलाई प्रभावकारी बनाउने तथा दक्षिण कोरियासम्बन्धी सैन्य निगरानीलाई तीव्र बनाउने विषयमा विस्तृत छलफल गरिएको थियो।

प्योङयाङले आफ्नो राष्ट्रिय सुरक्षाका लागि आणविक कार्यक्रमलाई निरन्तर सुदृढ बनाउने नीति दोहोर्‍याएसँगै कोरियाली प्रायद्वीपमा सुरक्षा चुनौती थप गम्भीर बन्न सक्ने विश्लेषण गरिएको छ। उत्तर कोरियाको आणविक तथा क्षेप्यास्त्र कार्यक्रमका कारण उसमाथि संयुक्त राष्ट्रसंघसहित अन्तर्राष्ट्रिय समुदायले लामो समयदेखि विभिन्न आर्थिक तथा कूटनीतिक प्रतिबन्ध लगाउँदै आएको छ।

उत्तर र दक्षिण कोरियाबीच सन् १९५० देखि १९५३ सम्म चलेको कोरियाली युद्ध शान्ति सन्धिबिना युद्धविराममा टुंगिएको थियो। यही कारण दुवै देश कानुनी रूपमा अझै पनि युद्धकै अवस्थामा रहेको मानिन्छ।

यसैबीच, कोरिया इन्स्टिच्युट फर नेसनल युनिफिकेसन का एक वरिष्ठ अनुसन्धानकर्ताले उत्तर कोरियाको पछिल्लो निर्णयले प्योङयाङले दक्षिण कोरियालाई पहिलेभन्दा अझ स्पष्ट रूपमा ‘शत्रु राष्ट्र’ का रूपमा परिभाषित गर्दै आफ्नो सैन्य रणनीति अघि बढाइरहेको संकेत दिएको बताएका छन्।

विश्लेषकहरूका अनुसार उत्तर कोरियाको यो कदमले क्षेत्रीय सुरक्षा अवस्था थप संवेदनशील बन्नुका साथै अन्तर्राष्ट्रिय समुदायको चासो र कूटनीतिक दबाब पनि अझ बढ्ने सम्भावना रहेको छ।

Facebook Comments Box