समृद्धिको आधार निर्माणमा युवाको सक्रिय भूमिका अपरिहार्य : प्रचण्ड

काठमाडौं । नेपाली कम्युनिस्ट पार्टी (नेकपा)का संयोजक पुष्पकमल दाहाल ‘प्रचण्ड’ले मुलुकको समृद्धि र सामाजिक रूपान्तरणका लागि युवाहरूको सक्रिय भूमिका अपरिहार्य रहेको बताएका छन्।

अन्तर्राष्ट्रिय युवा दिवसका अवसरमा शुभकामना सन्देश जारी गर्दै प्रचण्डले नेपालको राजनीतिक, सामाजिक तथा सांस्कृतिक परिवर्तनमा युवाहरूको सङ्घर्ष, साहस र योगदान ऐतिहासिक रूपमा महत्वपूर्ण रहेको उल्लेख गरेका हुन्।

उनले सङ्घीय लोकतान्त्रिक गणतन्त्रलगायत प्राप्त राजनीतिक उपलब्धिको रक्षा गर्दै सामाजिक न्याय, समानता, सुशासन र समृद्धिको आधार निर्माणमा युवाहरूलाई अग्रणी भूमिका निर्वाह गर्न आह्वान गरेका छन्।

प्रचण्डले युवालाई शिक्षा, सीप तथा क्षमता विकासका पर्याप्त अवसर उपलब्ध गराउँदै रोजगारीको सुनिश्चितता गर्नुपर्नेमा जोड दिएका छन्। युवाको ऊर्जा, सिर्जनशीलता र क्षमतालाई राष्ट्र निर्माणको शक्तिमा रूपान्तरण गर्न सके मात्रै मुलुकले विकास र समृद्धिको अपेक्षित गति हासिल गर्न सक्ने उनको भनाइ छ।

उनले अन्तर्राष्ट्रिय युवा दिवसले नेपालको समग्र विकास प्रक्रियामा युवाको सार्थक सहभागिता, नेतृत्व र योगदानलाई थप प्रभावकारी बनाउने प्रेरणा प्रदान गरोस् भन्ने शुभकामनासमेत व्यक्त गरेका छन्।

Facebook Comments Box