दलित अभियन्ताको परिचय बनाएका खगेन्द्र सुनार विवादको घेरामा, विभिन्न आरोपमा दर्जनौँ उजुरी

काठमाडौं । दलित अधिकारको क्षेत्रमा सक्रिय अभियन्ताका रूपमा परिचित खगेन्द्र सुनार पछिल्लो समय विभिन्न विवाद र आरोपका कारण चर्चामा आएका छन्। ‘दलितका लागि दलित अभियान नेपाल’का संयोजकसमेत रहेका सुनारविरुद्ध अदालतको अवहेलना, गालीगलौज, धम्की, साइबर बुलिङ तथा ठगीलगायतका विषयमा विभिन्न उजुरी तथा मुद्दा परेको विवरण सार्वजनिक भएको छ।
अधिवक्ता मनिषा गौतमले २० वैशाख २०८२ मा सुनारविरुद्ध सर्वोच्च अदालतमा अदालतको अवहेलनासम्बन्धी मुद्दा दायर गरेकी थिइन्। गौतमका अनुसार रुकुम पश्चिमको सोती घटनासम्बन्धी मुद्दामा सुर्खेत उच्च अदालतले फैसला गरेपछि सुनारको नेतृत्वमा अदालत परिसरको गेटमा तोडफोड तथा नाराबाजी गरिएको थियो।
उक्त फैसलामा हत्या भएको ठहर भए पनि जातीय छुवाछुतको कसुर स्थापित नभएको भन्दै सुनार असन्तुष्ट बनेको बताइएको छ। त्यसक्रममा उनले उच्च अदालत सुर्खेतका न्यायाधीश सोमकान्त मैनाली र मातृकाप्रसाद भण्डारीलाई लक्षित गर्दै सामाजिक सञ्जालमा आपत्तिजनक अभिव्यक्ति दिएको आरोप छ। न्यायाधीशहरूको तस्वीरसमेत राखेर अपमानजनक शब्द प्रयोग गरिएको दाबीसमेत गरिएको छ।
यसै विषयमा अदालतको अवहेलनाको मुद्दा दायर गरेकी अधिवक्ता गौतमलाई समेत सुनारले सामाजिक सञ्जालमार्फत गालीगलौज तथा चरित्रहत्या गर्ने प्रयास गरेको आरोप लागेको छ। गौतमले त्यसविरुद्ध साइबर बुलिङसम्बन्धी उजुरीसमेत दिएको बताएकी छन्।
गौतमका अनुसार सुनारविरुद्ध विभिन्न जिल्लामा २३ वटा मुद्दा प्रक्रियामा छन्। आफूले मुद्दा दायर गरेपछि सुनारसँग सम्बन्धित व्यक्तिहरूबाट निरन्तर हैरानी तथा आपत्तिजनक सन्देश आउने गरेको उनको दाबी छ। उनले सुनारको गतिविधिले आफूलाई दलित अधिकारकर्मीका रूपमा प्रस्तुत गर्ने उनको दाबीमाथि नै प्रश्न उठाएको बताएकी छन्।
उच्च अदालत सुर्खेतको गेटमा भएको भनिएको तोडफोडको घटनाप्रति सुर्खेत जिल्ला अदालत बार एसोसिएसन तथा उच्च अदालत बार एसोसिएसन सुर्खेतले समेत विज्ञप्ति जारी गर्दै ध्यानाकर्षण जनाएका थिए।
सुनारको विगतको राजनीतिक तथा व्यावसायिक पृष्ठभूमि पनि विवादरहित नरहेको दाबी गरिएको छ। उनी नेपाली कांग्रेस निकट रहेर लामो समय राजनीतिमा सक्रिय रहेको तथा काभ्रेका कांग्रेस नेता गणेश लामासँग निकट रहेको बताइन्छ। पत्रकारितामा समेत सक्रिय रहेका सुनारमाथि विगतमा ठगी प्रकरणमा पक्राउ परेको आरोपसमेत लगाइएको छ। यद्यपि, यससम्बन्धी आरोपको स्वतन्त्र पुष्टि तथा अन्तिम कानुनी अवस्थाबारे स्पष्ट विवरण आवश्यक देखिन्छ।
यसैगरी, दैलेखको नारायण नगरपालिका–२ भैसेखोरका सुनारविरुद्ध १३ असार २०८१ मा स्वास्थ्य संस्था तोडफोड तथा स्वास्थ्यकर्मीमाथि हातपात गरेको आरोपमा पक्राउ पुर्जी जारी भएको विवरणसमेत सार्वजनिक भएको छ। उक्त घटनामा सुर्खेत जिल्ला अस्पतालका प्रमुख डा. सोजन सापकोटाले जाहेरी दिएको बताइएको छ।
दलित समुदायको अधिकार र सामाजिक न्यायका पक्षमा आवाज उठाउने व्यक्तिका रूपमा सार्वजनिक भूमिकामा रहेका सुनारमाथि नै यस्ता आरोपहरू लागेपछि उनको गतिविधि र कार्यशैलीबारे प्रश्न उठ्न थालेका छन्।
यद्यपि, सुनारविरुद्ध लगाइएका आरोपहरू अदालतबाट अन्तिम रूपमा प्रमाणित भइसकेका विषय नभएकाले उनलाई दोषी ठहर गर्नेभन्दा पनि सम्बन्धित उजुरी, मुद्दा र कानुनी प्रक्रियाको निष्पक्ष निरुपण आवश्यक देखिन्छ।
जनरक्षा मिडियालमन सार्वजनिक भएका अभिलेख, उजुरी तथा सम्बन्धित पक्षका भनाइका आधारमा सुनारको विवादित पृष्ठभूमिबारे तथ्य खोजीलाई निरन्तरता दिनेछ।

Facebook Comments Box