भोटेकोसी बाढीपछि नेपाललाई अमेरिकाको ३१ मिलियन डलर सहयोग घोषणा

काठमाडौं । संयुक्त राज्य अमेरिकाले भोटेकोसी बाढीपछि जारी उद्धार, पुनःस्थापना तथा पुनर्निर्माणका लागि नेपाललाई थप ३ करोड १० लाख अमेरिकी डलर (३१ मिलियन डलर) सहयोग उपलब्ध गराउने भएको छ ।
अमेरिकाको राजनीतिक मामिला हेर्ने उपविदेशमन्त्री (अन्डर सेक्रेटरी अफ स्टेट) एलिसन हुकरले बुधबार न्युयोर्कमा नेपालका परराष्ट्रमन्त्री शिशिर खनालसँग भेटवार्ता गर्दै उक्त सहयोग घोषणा गरेकी हुन् ।
भेटवार्ताका क्रममा उपविदेशमन्त्री हुकरले बाढीबाट क्षतिग्रस्त महत्वपूर्ण यातायात पूर्वाधारको पुनःस्थापना तथा प्रभावित समुदायको पुनःउत्थानमा सहयोग पुग्ने गरी अमेरिकी सहायता परिचालन गरिने जानकारी दिइन् ।
सहयोगअन्तर्गत स्थायी तथा विशेष रूपमा निर्माण गरिएका पुल निर्माणका लागि मात्रै १ करोड अमेरिकी डलर (१० मिलियन डलर) उपलब्ध गराइने भएको छ । ती पुल अमेरिकी कम्पनीमार्फत उपलब्ध गराइनेछन् ।
भोटेकोसी बाढीबाट क्षतिग्रस्त तथा विच्छेद भएको यातायात सञ्जाल पुनःस्थापित गर्न प्रस्तावित पुलले महत्वपूर्ण भूमिका खेल्ने अपेक्षा गरिएको छ । पुल निर्माणपछि प्रभावित क्षेत्रका बासिन्दाको आवागमन सहज हुनुका साथै अत्यावश्यक वस्तु तथा सेवाको पहुँचमा सुधार आउने विश्वास गरिएको छ ।
अमेरिकी सहयोगले प्रभावित क्षेत्रमा यातायात पूर्वाधार पुनःस्थापनासँगै क्षेत्रीय सम्पर्क सञ्जाललाई थप सुदृढ बनाउनसमेत योगदान पुर्‍याउने अपेक्षा गरिएको छ ।
भोटेकोसी बाढीपछि नेपालमा उद्धार तथा राहतसँगै दीर्घकालीन पुनःस्थापना र पुनर्निर्माणको काम अघि बढिरहेका बेला अमेरिकाले घोषणा गरेको थप सहयोगले प्रभावित क्षेत्रको भौतिक पूर्वाधार पुनर्निर्माणमा महत्वपूर्ण टेवा पुग्ने देखिएको छ ।

Facebook Comments Box