असोजमा भारततर्फ ५ अर्ब ९२ करोडको विद्युत् निर्यात

काठमाडौं । नेपाल विद्युत् प्राधिकरणले चालु आर्थिक वर्ष २०८३/८४ को असोज महिनामा भारततर्फ ५ अर्ब ९२ करोड ५० लाख रुपैयाँ बराबरको विद्युत् निर्यात गरेको छ ।

बाढीका कारण केही जलविद्युत् आयोजनाको उत्पादन बन्द हुँदा विद्युत् निर्यात प्रभावित भए पनि गत वर्षको असोज र चालु आर्थिक वर्षको भदौ महिनाको तुलनामा यस वर्ष असोजमा निर्यात कारोबार बढेको हो । यसैबीच, भारतको प्रसारण प्रणाली प्रयोग गरी बंगलादेशतर्फ हुँदै आएको ४० मेगावाट विद्युत् निर्यातसमेत पुनः सुरु भएको छ ।

नेपाल विद्युत् प्राधिकरणको विद्युत् प्रणाली सञ्चालन विभाग (भार प्रेषण केन्द्र) को तथ्यांकअनुसार असोज महिनामा भारततर्फ कुल ६३ करोड ३९ लाख ८६ हजार ८ युनिट विद्युत् निर्यात भएको छ । उक्त विद्युत् बिक्रीबाट प्राधिकरणले ५ अर्ब ९२ करोड ५० लाख रुपैयाँ बराबरको आम्दानी गरेको हो ।

असोजमा भारततर्फ विद्युत् निर्यात दुई माध्यमबाट गरिएको थियो । द्विपक्षीय विद्युत् बिक्री सम्झौताअनुसार भारतका हरियाणा र बिहार राज्यमा विद्युत् बिक्री गरिएको थियो । त्यसैगरी, बाँकी विद्युत् भारतीय ऊर्जा विनिमय बजारको डे-अहेड र रियल टाइम बजारमा प्रतिस्पर्धी दरमा बिक्री गरिएको प्राधिकरणले जनाएको छ ।

जलविद्युत् आयोजनाको उत्पादनमा बाढीले असर पुर्‍याए पनि विद्युत् निर्यात कारोबार बढ्नु र बंगलादेशतर्फको निर्यात पुनः सुरु हुनुले नेपालको विद्युत् व्यापारलाई क्षेत्रीय बजारसँग जोड्ने प्रयासलाई निरन्तरता दिएको छ ।

Facebook Comments Box