मनसुन सक्रिय: देशभर वर्षा, चट्याङ र हिमपातको सम्भावना, केही क्षेत्रमा भारी वर्षाको चेतावनी

काठमाडौँ । देशभर मनसुनी वायुको प्रभाव कायम रहेकाले आगामी दुई दिनसम्म वर्षा, मेघगर्जन, चट्याङ तथा उच्च हिमाली क्षेत्रमा हिमपातको सम्भावना रहेको जल तथा मौसम पूर्वानुमान महाशाखाले जनाएको छ।

महाशाखाका अनुसार शुक्रबार बिहान देशभर सामान्यदेखि पूर्ण बदली रहेको छ। बागमती प्रदेशका केही स्थान तथा कोशी र लुम्बिनी प्रदेशका थोरै स्थानमा वर्षा भइरहेको छ। शुक्रबार दिउँसो पनि देशभर सामान्यतया बदली रहने र हिमाली तथा पहाडी भू-भागका केही स्थानमा वर्षा तथा हिमपातको सम्भावना रहेको छ। तराईका थोरै स्थानमा समेत मेघगर्जन र चट्याङसहित वर्षा हुन सक्ने पूर्वानुमान गरिएको छ।

महाशाखाले शुक्रबार राति कोशी, बागमती, गण्डकी र लुम्बिनी प्रदेशका पहाडी तथा तराई क्षेत्रका एक-दुई स्थानमा भारी वर्षा हुन सक्ने चेतावनी दिएको छ। साथै, कर्णाली र सुदूरपश्चिम प्रदेशका हिमाली क्षेत्रमा पनि मेघगर्जनसहित वर्षा तथा हिमपातको सम्भावना रहेको बुलेटिनमा उल्लेख गरिएको छ।

यसैबीच, असार २० गते शनिबार पनि मौसममा उल्लेखनीय सुधार आउने संकेत देखिएको छैन। शनिबार दिउँसो पहाडी तथा हिमाली क्षेत्रमा सामान्यदेखि पूर्ण बदली रहने तथा तराई क्षेत्रमा आंशिकदेखि सामान्य बदली रहने प्रक्षेपण गरिएको छ। देशका विभिन्न स्थानमा मध्यम वर्षासँगै उच्च हिमाली क्षेत्रमा हिमपातको क्रम जारी रहने महाशाखाले जनाएको छ।

शनिबार राति भने बागमती, गण्डकी, लुम्बिनी, कर्णाली र सुदूरपश्चिम प्रदेशमा मौसम पूर्णतया बदली रहने अनुमान गरिएको छ। विशेषगरी बागमती, गण्डकी, लुम्बिनी र सुदूरपश्चिम प्रदेशका पहाडी तथा तराई भू-भागका एक-दुई स्थानमा भारी वर्षाको सम्भावना रहेकाले आवश्यक सतर्कता अपनाउन महाशाखाले आग्रह गरेको छ।

Facebook Comments Box