आज पाँच संसदीय समितिको बैठक बस्दै, विभिन्न समसामयिक विषयमा छलफल हुने

काठमाडौं । संघीय संसद् अन्तर्गतका पाँच वटा संसदीय समितिको बैठक आज बस्दैछ । समितिहरूले आर्थिक, सामाजिक, प्रशासनिक, स्वास्थ्य तथा समसामयिक विषयमा छलफल गर्दै विभिन्न प्रतिवेदन र विधेयकमाथि छलफल गर्ने कार्यसूची तय गरेका छन् ।

अर्थ समितिको बैठक बिहान ११ बजे बस्नेछ । बैठकमा समितिका विभिन्न उपसमितिहरूबाट प्रस्तुत प्रतिवेदनमाथि पेस तथा छलफल गरिनेछ ।

त्यस्तै, बिहान ११ बजे नै बस्ने महिला तथा सामाजिक मामिला समितिको बैठकमा मुस्लिम आयोगको कामकारबाही, प्रगति विवरण तथा आगामी योजनाबारे आयोगका पदाधिकारीहरूसँग छलफल हुनेछ ।

राज्य व्यवस्था तथा सुशासन समितिको बैठक दिउँसो १ बजे बस्नेछ । उक्त बैठकमा ‘राष्ट्रिय सेवा दल विधेयक, २०८३’ माथि सैद्धान्तिक छलफल गरिनेछ भने अख्तियार दुरुपयोग अनुसन्धान आयोग र विभिन्न कारागार कार्यालयहरूको स्थलगत अनुगमनबाट प्राप्त प्रतिवेदन पेस तथा छलफल गर्ने कार्यसूची रहेको छ ।

यसैगरी, शिक्षा, स्वास्थ्य तथा सूचना प्रविधि समितिको बैठक बिहान १० बजे बस्दैछ । बैठकमा स्वास्थ्य तथा खाद्य स्वच्छता मन्त्रालयको वर्तमान अवस्था, समसामयिक चुनौती, समस्या र आगामी कार्ययोजनाका विषयमा छलफल हुनेछ ।

राज्यका निर्देशक सिद्धान्त, नीति र दायित्वको कार्यान्वयन अनुगमन तथा मूल्याङ्कन समितिको बैठक भने दिउँसो साढे २ बजे बस्नेछ । उक्त बैठकमा मुलुकको वर्तमान अवस्था तथा समसामयिक विषयहरूमा केन्द्रित रहेर छलफल गरिनेछ ।

संसदीय समितिका यी बैठकहरूले सरकारका नीति, कानुन निर्माण प्रक्रिया र सार्वजनिक सरोकारका विषयमा थप मार्गदर्शन गर्ने अपेक्षा गरिएको छ ।

Facebook Comments Box