बाढी–पहिरोको कहर : देशभरका प्रमुख राजमार्गमा यातायात प्रभावित, कतै पूर्ण अवरुद्ध कतै एकतर्फी सञ्चालन

काठमाडौं । बाढी, पहिरो, सडक मर्मत तथा निर्माणका कारण देशका विभिन्न स्थानमा प्रमुख राजमार्ग तथा सडकखण्डको यातायात प्रभावित भएको छ। नेपाल प्रहरीले सार्वजनिक गरेको विवरणअनुसार बागमती, गण्डकी र कर्णाली प्रदेशका विभिन्न सडकखण्डमा कतै पूर्ण रूपमा यातायात रोकिएको छ भने कतै एकतर्फी तथा सीमित सवारी सञ्चालन भइरहेको छ।
बागमती प्रदेशअन्तर्गत काभ्रे, रसुवा, नुवाकोट, धादिङ र चितवनका सडकखण्डहरू बढी प्रभावित भएका छन्।
काभ्रेमा सम्भावित बाढीको जोखिमका कारण खुर्कोट–नेपालथोक–कटुञ्जेबेसी सडकखण्डमा सम्पूर्ण सवारीसाधनको आवागमन रोकिएको प्रहरीले जनाएको छ। उक्त सडकखण्डमा अर्को सूचना जारी नभएसम्म यातायात सञ्चालन नगर्न भनिएको छ।
रसुवामा बाढीका कारण मुख्य राजमार्ग पूर्ण रूपमा अवरुद्ध भएको छ। बाढीले सडक संरचनामा क्षति पुर्‍याएपछि यस क्षेत्रमा यातायात सञ्चालन प्रभावित बनेको हो।
नुवाकोटमा सम्भावित बाढी तथा पहिरोको जोखिमलाई मध्यनजर गर्दै टोखा–छहरे सडकखण्डमा रातिको समयमा सवारीसाधन सञ्चालनमा रोक लगाइएको छ। विदुर नगरपालिका–१० सिमटारस्थित पासाङ ल्हामु सडकखण्डमा भने यातायात पूर्ण रूपमा अवरुद्ध रहेको प्रहरीले जनाएको छ।
धादिङमा बेनीघाट रोराङ गाउँपालिका–७ स्थित कृष्णभीर क्षेत्रमा पहिरोका कारण पृथ्वी राजमार्ग पूर्ण रूपमा अवरुद्ध भएको छ। सोही गाउँपालिका–१० ज्वालामुखी तथा पृथ्वी राजमार्गको शीतलबजार क्षेत्रमा भने एकतर्फी रूपमा सवारी सञ्चालन भइरहेको छ।
चितवनको तुइनखोला क्षेत्रमा नारायणगढ–मुग्लिन सडकखण्डमा सडक मर्मतको काम भइरहेकाले सवारीको चापअनुसार एकतर्फी आवागमन सञ्चालन गरिएको छ। मर्मतका क्रममा सवारी आवागमन व्यवस्थापन गर्न आवश्यकताअनुसार एकतर्फी प्रणाली अपनाइएको हो।
यस्तै, गण्डकी प्रदेशको मनाङमा नासों गाउँपालिका–३ धारापानीस्थित चामे–बेँसीसहर सडकखण्डमा ठूला सवारीसाधन सञ्चालन हुन नसकेको प्रहरीले जनाएको छ। उक्त सडकखण्डमा हाल साना सवारीसाधन मात्र सञ्चालन भइरहेका छन्।
कर्णाली प्रदेशको हुम्लामा सर्केगाड गाउँपालिका–६ स्थित कर्णाली करिडोर पहिरोका कारण पूर्ण रूपमा अवरुद्ध भएको छ। पहिरोले सडक अवरुद्ध भएपछि उक्त क्षेत्रमा यातायात सञ्चालन ठप्प भएको प्रहरीले जनाएको छ।
लगातारको वर्षा, बाढीपहिरो तथा सडक मर्मतका कारण राजमार्गमा आवागमन प्रभावित भइरहेकाले यात्रुलाई यात्रा गर्नुअघि सम्बन्धित निकायबाट सडकको पछिल्लो अवस्थाबारे जानकारी लिन प्रहरीले आग्रह गरेको छ।

Facebook Comments Box