राष्ट्र बैंकले आजदेखि एक हजार दरका नयाँ नोट चलनचल्तीमा ल्याउँदै

काठमाडौँ । नेपाल राष्ट्र बैंकले आजदेखि एक हजार रुपैयाँ दरका नयाँ नोट चलनचल्तीमा ल्याउने भएको छ।

राष्ट्र बैंकको मुद्रा व्यवस्थापन विभागका अनुसार बिहीबारदेखि एक हजार दरका नयाँ नोट प्रचलनमा ल्याउन लागिएको हो। साविककै आकारमा तयार गरिएको नयाँ नोटमा रङ परिवर्तन गरी बैजनी रङको घेराभित्र फिक्का हरियो रङ प्रयोग गरिएको छ।

नयाँ नोटको अग्रभागको बायाँतर्फ सगरमाथा हिमालको चित्र राखिएको छ भने दायाँतर्फ लालीगुराँसको पानी छाप रहेको छ। सोही पानी छापको मुनि १००० अंकित पानी छापसमेत राखिएको राष्ट्र बैंकले जनाएको छ।

नोटको मध्य भागमा चितवनस्थित सरकारी हात्तीसारमा नेपाल सरकारको स्वामित्वमा रहेका हात्तीमध्ये देवकली नामक हात्तीबाट जन्मिएका दुर्लभ मानिने ‘राम’ र ‘लक्ष्मण’ नामका जुम्ल्याहा हात्तीको चित्र राखिएको छ।

राष्ट्र बैंकका अनुसार नयाँ नोटको सिरिज ‘२०२५’ रहेको छ। यसको संकेत नम्बर ९२०००००१ देखि ५०९९९९९९ सम्म रहेको जनाइएको छ।

नयाँ नोट चलनचल्तीमा आए पनि साविकका एक हजार रुपैयाँ दरका नोटको प्रचलन यथावत् रहनेछ।

Facebook Comments Box