छिपहरमाईमा हाजिर भए विवादित पृष्ठभूमिका प्रमुख प्रशासकीय अधिकृत सर्वजीत झा

वीरगंज, १५ असोज। पर्साको छिपहरमाई गाउँपालिकामा प्रमुख प्रशासकीय अधिकृतका रूपमा सर्वजीत कुमार झाले पदभार ग्रहण गरेका छन्। विभिन्न स्थानीय तहमा कार्यरत रहँदा प्रशासनिक विवाद तथा आर्थिक अनियमिततासम्बन्धी आरोपसँग जोडिएका झाको छिपहरमाई आगमनलाई स्थानीयस्तरमा चासोका साथ हेरिएको छ।

बुधबार गाउँपालिका उपाध्यक्ष लिलावती देवी कानुले गम्छा, अबिर टीका तथा फूलमाला लगाएर झालाई स्वागत गरेकी थिइन्। स्वागत कार्यक्रममा उपाध्यक्ष कानुसहित वडाध्यक्ष, जनप्रतिनिधि, कर्मचारी तथा समाजसेवीहरूको सहभागिता थियो।

पदभार ग्रहण गर्दै झाले सुशासन, प्रभावकारी सेवा प्रवाह तथा विकास निर्माणका कामलाई प्राथमिकतामा राख्ने बताए। जनप्रतिनिधि, कर्मचारी र स्थानीय समुदायबीच समन्वय तथा सहकार्य गर्दै नागरिकलाई सहज, छिटोछरितो र गुणस्तरीय सेवा उपलब्ध गराउने प्रतिबद्धता उनले व्यक्त गरे।

झा यसअघि मधेश प्रदेशका विभिन्न स्थानीय तहमा प्रमुख प्रशासकीय अधिकृतका रूपमा कार्यरत थिए। संघीय मामिला तथा सामान्य प्रशासन मन्त्रालयको अभिलेखमा सिरहाको औरही गाउँपालिकामा प्रमुख प्रशासकीय अधिकृत रहेका झालाई धनुषाको लक्ष्मीनियाँ गाउँपालिकामा कामकाजका लागि खटाइएको विवरण उल्लेख छ।

लक्ष्मीनियाँ गाउँपालिकामा झाको हाजिरीसँगै प्रमुख प्रशासकीय अधिकृतको विषयलाई लिएर विवाद उत्पन्न भएको थियो। प्रकाशित समाचारअनुसार उक्त विवादले उग्र रूप लिएपछि गाउँपालिकाको प्रशासनिक कामकाजसमेत प्रभावित भएको थियो। कर्मचारीले तलबभत्ता नपाएको तथा सामाजिक सुरक्षा वितरणमा समेत असर परेको उल्लेख गरिएको थियो।

झासँग जोडिएको अर्को विवाद धनुषाकै हंसपुर नगरपालिकासँग सम्बन्धित छ। त्यहाँ कार्यरत रहँदा तत्कालीन उपप्रमुख दुर्गादेवी मण्डलसँग प्रशासनिक विषयलाई लिएर विवाद भएको दाबी सार्वजनिक भएको थियो। उपप्रमुख मण्डलले आफूलाई सेवासुविधा रोक्ने चेतावनी दिइएको तथा राजस्व परामर्श समितिको निर्णयमा हस्ताक्षर गर्ने विषयमा विवाद भएको दाबी गरेकी थिइन्।

पोखरी तथा एम्बुलेन्सबाट प्राप्त आम्दानीको विवरण सार्वजनिक गर्नुपर्ने विषय उठाएपछि विवाद बढेको उनको भनाइ थियो। सोही क्रममा नगरका केही जनप्रतिनिधिले नगर प्रमुख र प्रमुख प्रशासकीय अधिकृतको कार्यशैली तथा आर्थिक पारदर्शितामाथि प्रश्न उठाएको दाबीसमेत सार्वजनिक भएको थियो।

त्यसअघि सिरहाको औरही गाउँपालिकामा कार्यरत रहँदा पनि झाको कार्यशैलीलाई लिएर आर्थिक विषयमा प्रश्न उठाइएको थियो। सञ्चारमाध्यममा प्रकाशित विवरणअनुसार कर्मचारीको काज सरुवा, योजना तथा जिन्सी शाखाको जिम्मेवारी र भुक्तानी प्रक्रियासँग सम्बन्धित विषयमा झासहितका पदाधिकारीमाथि आर्थिक चलखेलको आरोप लगाइएको थियो।

त्यसक्रममा केही रकम झाको व्यक्तिगत बैंक खातामा जम्मा गरिएको विषयसमेत प्रश्नमा आएको थियो। सार्वजनिक आरोपअनुसार उक्त रकम घुस वा कमिसनसँग सम्बन्धित रहेको दाबी गरिएको थियो। तर झाले भने बैंक खातामा रकम जम्मा भएको विषय स्वीकार गर्दै उक्त रकम घुस वा कमिसन नभई आफूले दिएको सापटी फिर्ता लिएको दाबी गरेका थिए। उनले आवश्यक परे छानबिन सामना गर्न तयार रहेको बताएका थिए।

झाको कार्यकालसँग जोडिएका विवाद केवल आर्थिक विषयमा मात्र सीमित देखिँदैनन्। विभिन्न स्थानीय तहमा उनको हाजिरी, सरुवा तथा प्रशासनिक जिम्मेवारीलाई लिएर समेत विवाद उत्पन्न भएको सार्वजनिक विवरणहरू छन्। लक्ष्मीनियाँमा उनको हाजिरीपछि उत्पन्न विवादका कारण पालिकामा तालाबन्दीसम्मको अवस्था आएको समाचार प्रकाशित भएको थियो।

अब भने झा पर्साको छिपहरमाई गाउँपालिकाको प्रशासनिक नेतृत्वमा पुगेका छन्। यसअघि प्रमुख प्रशासकीय अधिकृत सञ्जीव साह कार्यरत रहेकोमा उनको सरुवापछि झालाई नयाँ जिम्मेवारी दिइएको हो।

विगतमा विभिन्न विवाद र आरोपसँग जोडिएका झाको छिपहरमाई आगमनसँगै यहाँको प्रशासनिक कार्यशैली, निर्णय प्रक्रिया, आर्थिक पारदर्शिता र सेवा प्रवाहलाई स्थानीयस्तरमा नजिकबाट नियालिने अपेक्षा गरिएको छ।

छिपहरमाईमा झाका लागि विगतका विवादभन्दा बाहिर रहेर पारदर्शी प्रशासन सञ्चालन गर्नु, जनप्रतिनिधि र कर्मचारीबीच समन्वय कायम गर्नु तथा नागरिकलाई प्रभावकारी सेवा उपलब्ध गराउनु प्रमुख जिम्मेवारीका रूपमा रहनेछ।

नोट : झासँग सम्बन्धित आर्थिक चलखेल, व्यक्तिगत खातामा रकम जम्मा गराएको तथा उपप्रमुखसँग विवाद भएको विषय विभिन्न व्यक्ति र सञ्चारमाध्यममा सार्वजनिक भएका आरोप तथा दाबीमा आधारित छन्। ती आरोपलाई अदालत वा सम्बन्धित निकायबाट प्रमाणित भएको तथ्यका रूपमा प्रस्तुत गरिएको छैन। झाले आर्थिक विषयमा उठेका आरोपबारे आफ्नो फरक धारणा सार्वजनिक गरेका छन्।

Facebook Comments Box