बेनीमा पहिरोको वितण्डा : १२ घरमा क्षति, न्युरोड र गणेशटोलका सय घर जोखिममा

म्याग्दी । म्याग्दीको सदरमुकाम बेनी बजार पछाडिको पाखोबाट खसेको पहिरोले १२ घरमा क्षति पुर्‍याएको छ । बेनी नगरपालिका–८ न्युरोडस्थित खोरियाको पाखोबाट बुधबार दिउँसोदेखि बिहीबार बिहानसम्म तीन पटक पहिरो खसेपछि स्थानीयवासी त्रसित बनेका छन् ।

पहिरोसँगै आएको लेदो घरभित्र पसेपछि ६ वटा घर बस्नै नमिल्ने अवस्थामा पुगेका छन् भने थप ६ घरमा आंशिक क्षति पुगेको बेनी नगरपालिकाका प्रमुख सुरत केसीले जानकारी दिए । जोखिममा रहेका परिवारलाई सुरक्षित स्थानमा सारिएको छ ।

नगरप्रमुख केसीका अनुसार पाखामा रहेका पानीका मुहानबाट भूमिगत पानी बगेसँगै पहिरो खसिरहेको छ । थप क्षति हुन नदिन प्राविधिक टोलीमार्फत पहिरोको अवस्था अध्ययन गर्नुका साथै पहिरो पन्छाउने र पानीको बहावलाई सुरक्षित रूपमा तर्काउने काम भइरहेको छ ।

“बुधबार दिउँसोदेखि आज बिहानसम्म तीन पटक पहिरो खसेको छ । पाखामा रहेका मुहानबाट बगेको भूमिगत पानीसँगै पहिरो खसेपछि जोखिममा रहेका नागरिकलाई सुरक्षित ठाउँमा सारिएको छ,” नगरप्रमुख केसीले भने, “थप क्षति हुन नदिन प्राविधिक टोलीको अध्ययनसँगै पहिरो पन्छाउने र पानी तर्काउने काम भइरहेको छ ।”

पहिरोको जोखिम बढेपछि न्युरोडका बासिन्दाले बुधबार राति नै घर छाडेका थिए । सम्भावित क्षतिलाई ध्यानमा राख्दै कृषि विकास बैंक र ग्लोबल आइएमई बैंकका शाखा कार्यालयमा रहेका महत्वपूर्ण कागजपत्र तथा सामग्रीसमेत सुरक्षित स्थानमा सारिएको नगरप्रमुख केसीले बताए ।

बिहीबार बिहानदेखि नेपाली सेना, नेपाल प्रहरीलगायत सुरक्षाकर्मीको टोली पहिरो प्रभावित क्षेत्रमा परिचालन गरिएको छ । सुरक्षाकर्मीले जोखिममा रहेका घरभित्रका सामान सुरक्षित स्थानमा सार्ने तथा प्रभावित क्षेत्रमा उद्धार र व्यवस्थापनको काम गरिरहेका छन् ।

पहिरोको त्रासका कारण स्थानीयवासी रातभर जाग्राम बसेका थिए । स्थानीय चिरञ्जीवी शर्माले पहिरो खस्ने क्रम नरोकिएपछि न्युरोडवासी रातभर घरबाहिर तथा सुरक्षित स्थानमा बसेर अवस्था नियाल्न बाध्य भएको बताए ।

पहिरो प्रभावित घरमा डेरामा बस्दै आएका परिवारका लागि खानाको व्यवस्थासमेत मिलाइएको बेनी नगरपालिका–८ का वडाध्यक्ष उत्तम कर्माचार्यले जानकारी दिए । उनका अनुसार पछिल्ला चार दिनदेखि जमिनमा चिरा पर्ने क्रम बढ्दै गएको थियो भने बुधबारदेखि पहिरो खस्न थालेको हो ।

वडाध्यक्ष कर्माचार्यका अनुसार करिब ३०० मिटर उचाइ, ५०० मिटर चौडाइ र १०० मिटर लम्बाइ क्षेत्रको खरबारी चिराचिरा परेर फुटेको छ । पाखाका रूखहरू ढल्ने तथा ढल्किने क्रमसमेत बढेको छ ।

“पानीको मुहान भएको ठाउँबाट सुरु भएको पहिरोले पाखाको तल र माथि दुवैतर्फ असर गरेको छ,” कर्माचार्यले भने, “बेनी बजारमा खानेपानी आपूर्ति गराउने मुख्य पाइपलाइनसमेत चुँडिएका छन् र ठाउँ–ठाउँमा भाँचिएका छन् ।”

पहिरोको जोखिम न्युरोडमा मात्रै सीमित नरहेको स्थानीय प्रशासनले जनाएको छ । यसबाट बेनी नगरपालिका–८ को न्युरोड र गणेशटोल क्षेत्रका करिब १०० घर प्रभावित हुन सक्ने जोखिम रहेको बताइएको छ ।

म्याग्दीका प्रमुख जिल्ला अधिकारी गणेश गैरेले पहिरो प्रभावित क्षेत्रको तत्काल प्राविधिक अध्ययनका लागि भूगर्भविद्को टोली पठाउन सम्बन्धित निकायमा पत्राचार गरिएको जानकारी दिए ।

भूगर्भविद्हरूको अध्ययन र सुझावका आधारमा पहिरोको वास्तविक अवस्था तथा थप क्षतिको सम्भावना आकलन गर्न सकिने उनले बताए । सम्भावित जोखिमबाट जोगिन स्थानीयवासीलाई सतर्क रहन र आवश्यक सावधानी अपनाउन प्रशासनले आग्रह गरेको छ ।

बेनी बजारको घना बस्ती नजिकै पहिरो सक्रिय भएपछि स्थानीयवासीमा त्रास बढेको छ । पहिरोको कारण खानेपानीको मुख्य पाइपलाइनमा समेत क्षति पुगेकाले बजारको खानेपानी आपूर्तिमा समेत असर पर्न सक्ने देखिएको छ । अहिले सुरक्षाकर्मी, स्थानीय तह र प्राविधिक टोलीको समन्वयमा जोखिम न्यूनीकरण तथा प्रभावित परिवारको व्यवस्थापनको काम भइरहेको छ ।

Facebook Comments Box