इजरायल रोजगारी ठगी प्रकरणमा कांग्रेस नेतृ विनिता खड्का पक्राउ, सीआईबीको अनुसन्धान तीव्र

काठमाडौं । जीटूजी (सरकार–सरकार) प्रक्रियामार्फत इजरायलमा केयरगिभरको रोजगारीमा पठाइदिने भन्दै साढे दुई करोड रुपैयाँभन्दा बढी रकम ठगी गरेको आरोपमा नेपाली कांग्रेसकी नेतृ विनिता खड्का पक्राउ परेकी छन्। नेपाल प्रहरीको केन्द्रीय अनुसन्धान ब्युरो (सीआईबी) ले खड्कालाई पक्राउ गरी अनुसन्धान अघि बढाएको छ।

नेपाली कांग्रेसको १५औँ महाधिवेशनमा खुला महिला समूहबाट केन्द्रीय सदस्य पदमा उम्मेदवारी दिएकी खड्का यसअघि विशेष महाधिवेशनबाट पनि केन्द्रीय सदस्यमा निर्वाचित भएकी थिइन्। उनीमाथि इजरायल रोजगारीमा पठाइदिने प्रलोभन देखाएर युवाबाट रकम असुलेको आरोप छ।

सीआईबी प्रमुख एआईजी उमा प्रसाद चतुर्वेदीको नेतृत्वमा इजरायल रोजगारी ठगी प्रकरणको अनुसन्धान अघि बढाइएको छ। यसअघि प्रहरीले रामेछापका भरत चौलागाईं र बालिका शिवाकोटीसहित चार जनालाई पक्राउ गरिसकेको छ। चौलागाईं कांग्रेसका नेता हुन् भने शिवाकोटी कांग्रेससम्बद्ध प्रेस युनियनकी केन्द्रीय सदस्य हुन्।

प्रहरीका अनुसार सन् २०२४ मा इजरायलमा केयरगिभरका रूपमा काम गर्न सञ्चालित परीक्षामा उत्तीर्ण भएर प्रतीक्षा सूचीमा रहेका युवालाई लक्षित गरी ठगी गरिएको थियो। उक्त परीक्षामा ३ हजार ४६१ जना उत्तीर्ण भएकामा १ हजार १५२ जना प्रतीक्षा सूचीमा थिए।

रोजगारीको प्रतीक्षामा रहेका युवालाई लक्षित गर्दै गिरोहले प्रधानमन्त्रीका प्रमुख सल्लाहकारसँग निकट सम्बन्ध रहेको र मन्त्रिपरिषद्बाट विशेष निर्णय गराएर तत्काल इजरायल पठाइदिने भन्दै आश्वासन दिएको सीआईबीको भनाइ छ। त्यसक्रममा प्रधानमन्त्री तथा मन्त्रिपरिषद्को कार्यालयका नक्कली कागजातसमेत देखाएर युवालाई विश्वासमा पारिएको प्रहरीले जनाएको छ।

प्रहरीका अनुसार पहिलो चरणमा १५६ जनालाई इजरायल पठाइदिने भन्दै दुई करोड ५० लाख रुपैयाँभन्दा बढी रकम असुल गरिएको थियो। सरकारी प्रक्रियाबाट रोजगारीमा पठाइदिने आश्वासन दिँदै रकम संकलन गरिएको घटनामा थप व्यक्ति र पीडितसमेत जोडिएको हुन सक्ने आशंकामा अनुसन्धान भइरहेको छ।

यस प्रकरणमा थप पीडित हुन सक्ने भन्दै सीआईबीले आवश्यक प्रमाणसहित यथाशीघ्र जाहेरी दरखास्त दिन सार्वजनिक आह्वानसमेत गरेको छ। रोजगारीका नाममा रकम बुझाएका व्यक्तिलाई सम्बन्धित प्रमाण सुरक्षित राखी प्रहरीसमक्ष जानकारी गराउन आग्रह गरिएको छ।

सरकारी प्रक्रियामार्फत वैदेशिक रोजगारीमा पठाइदिने भन्दै नक्कली कागजात प्रयोग गरी रकम असुलिएको आरोपले वैदेशिक रोजगारीका नाममा हुने ठगीको जोखिमलाई फेरि उजागर गरेको छ। पक्राउ परेका व्यक्तिमाथि लागेको आरोपको अन्तिम निरूपण भने अनुसन्धान र न्यायिक प्रक्रियाबाट हुनेछ।

Facebook Comments Box