बीपी राजमार्ग पुनः सञ्चालनमा, पिन्थलीमा पहिरो र लेदो हटाइयो

काभ्रेपलाञ्चोक । काभ्रेपलाञ्चोकको रोशी गाउँपालिका–९ स्थित पिन्थलीमा पहिरोसँगै लेदो खसेर अवरुद्ध भएको बीपी राजमार्ग पुनः सञ्चालनमा आएको छ ।

रातिदेखि अवरुद्ध राजमार्गमा पहिरो र लेदो हटाएपछि दुईतर्फी यातायात सञ्चालनमा आएको हो । सडक खुलेसँगै रोकिएका सवारीसाधन गन्तव्यतर्फ जान थालेका छन् ।

वर्षा र पहिरोका कारण राजमार्गमा जोखिम कायमै रहन सक्ने भएकाले जिल्ला प्रशासन कार्यालय काभ्रेपलाञ्चोकले यात्रु तथा सवारी चालकलाई सतर्कता अपनाएर यात्रा गर्न आग्रह गरेको छ ।

प्रशासनले यात्रा गर्नुअघि सडकको पछिल्लो अवस्थाबारे जानकारी लिएर मात्र गन्तव्यतर्फ लाग्न अनुरोध गरेको छ । विशेषगरी पहिरोको जोखिम रहेका स्थानमा सावधानी अपनाउन र सडकको अवस्था प्रतिकूल देखिएमा अनावश्यक जोखिम नलिन आग्रह गरिएको छ ।

राजमार्गको अवस्थाबारे जानकारी लिन स्थानीय प्रहरी, प्रहरीको आपत्कालीन नम्बर १०० वा जिल्ला आपत्कालीन सञ्चालन केन्द्रको १२३४ नम्बरमा सम्पर्क गर्न सकिने जिल्ला प्रशासन कार्यालयले जनाएको छ ।

Facebook Comments Box