लेन उल्लंघनमा सभामुख अर्यालकै गाडी कारबाहीमा, सिंहदरबारमै ट्राफिक प्रहरीको ‘एक्सन’

काठमाडौं । लेन उल्लंघन गरेको आरोपमा सभामुख डोलप्रसाद अर्याल चढेको गाडीलाई ट्राफिक प्रहरीले कारबाही गरेको छ। थापाथली क्षेत्रमा लेन क्रस गरी ट्राफिक नियम उल्लंघन गरेपछि अर्याल सवार गाडीसहित अघिपछि हिँडेका अन्य सवारीसमेत नियन्त्रणमा लिएर चिट काटिएको हो।

ट्राफिक प्रहरी स्रोतका अनुसार नियम उल्लंघन पुष्टि भएपछि प्रहरी टोली सिंहदरबारसम्मै पुगेर कारबाही प्रक्रिया अघि बढाएको थियो। सिंहदरबार परिसरमा तीन वटा गाडीलाई औपचारिक रूपमा चिट काटिएको बताइएको छ।

उच्च पदस्थ व्यक्तिको सवारीमा समेत नियम उल्लंघन हुँदा ट्राफिक प्रहरीले बिना भेदभाव कारबाही गरेको यस घटनालाई कडाइका साथ नियम कार्यान्वयनको उदाहरणका रूपमा हेरिएको छ।

Facebook Comments Box