बागमतीको साक्षरता दर ८२.१ प्रतिशत, आर्थिक वृद्धिदर पनि राष्ट्रिय औसतभन्दा माथि हुने अनुमान

ललितपुर — बागमती प्रदेशको साक्षरता दर ८२.१ प्रतिशत पुगेको छ। राष्ट्रिय साक्षरता दर ७६.२ प्रतिशत रहेको अवस्थामा बागमती प्रदेशको दर त्यसको तुलनामा उच्च देखिएको हो।

प्रदेशका आर्थिक मामिला तथा योजनामन्त्री प्रभात तामाङका अनुसार चालु आर्थिक वर्षमा नेपालको आर्थिक वृद्धिदर ३.८५ प्रतिशत रहने अनुमान गरिएको छ भने बागमती प्रदेशको वृद्धिदर ५.४० प्रतिशत पुग्ने प्रक्षेपण गरिएको छ।

आर्थिक वर्ष २०८२/८३ मा नेपालको कुल गार्हस्थ्य उत्पादन (GDP) ६६ खर्ब ९ करोड रुपैयाँ पुग्ने अनुमान गरिएकोमा त्यसमा बागमती प्रदेशको योगदान ३६.७ प्रतिशत अर्थात् करिब २४ खर्ब २३ अर्ब रुपैयाँ रहने अनुमान गरिएको छ।

त्यस्तै, नेपालको प्रतिव्यक्ति आय १ हजार ५३५ अमेरिकी डलर रहने अनुमान हुँदा बागमती प्रदेशको प्रतिव्यक्ति आय २ हजार ६४४ अमेरिकी डलर पुग्ने प्रक्षेपण गरिएको छ, जुन प्रदेशहरूमध्ये सबैभन्दा बढी हो।

सरकारको आर्थिक वर्ष २०८३/८४ को बजेट विवरणअनुसार नेपालमा निरपेक्ष गरिबी २०.२७ प्रतिशत र बहुआयामिक गरिबी १७.४ प्रतिशत रहेको अवस्थामा बागमती प्रदेशमा निरपेक्ष गरिबी १२.५९ प्रतिशत र बहुआयामिक गरिबी ७ प्रतिशत रहेको उल्लेख गरिएको छ।

Facebook Comments Box