साना नदी–खोलामा आकस्मिक बाढीको जोखिम, सतर्क रहन महाशाखाको आग्रह

काठमाडौँ । जल तथा मौसम विज्ञान विभागअन्तर्गतको बाढी पूर्वानुमान महाशाखाले देशका विभिन्न स्थानमा बहने साना नदी तथा खोलामा आकस्मिक बाढी आउन सक्ने भन्दै सतर्कता अपनाउन आग्रह गरेको छ ।

महाशाखाका अनुसार हाल कोशी, नारायणी, बागमती, कर्णाली, महाकाली तथा तिनका सहायक नदीहरू, साथै कन्काई, कमला, बबई, पूर्वी राप्ती र पश्चिम राप्ती नदीको बहाव भने सतर्कता तहभन्दा तल नै रहेको छ । ठूला नदीहरूको अवस्था सामान्य रहे पनि साना नदी तथा खोलाहरूमा वर्षाका कारण बहाव बढ्न सक्ने जोखिम देखिएको महाशाखाले जनाएको छ ।

आज इलाम, झापा, तेह्रथुम, पाँचथर, धनकुटा, सप्तरी, सुनसरी, मोरङ, डोटी, डडेल्धुरा लगायतका जिल्ला तथा आसपासका क्षेत्रमा बहने स-साना नदीहरूमा बहाव उल्लेख्य बढ्ने अनुमान गरिएको छ । ती क्षेत्रमा आकस्मिक बाढीको मध्यम जोखिम रहेको महाशाखाले जनाएको छ ।

त्यस्तै ताप्लेजुङ, सङ्खुवासभा, सोलुखुम्बु, दोलखा, सिन्धुपाल्चोक, नवलपरासी (पश्चिम), रुपन्देही, कपिलवस्तु, दाङ, बाँके र बर्दियालगायतका जिल्लाका केही साना नदीहरूमा पनि आकस्मिक बाढीको सम्भावना रहेको बताइएको छ ।

महाशाखाले आगामी दुई दिनको मौसम पूर्वानुमानअनुसार भोलि कोशी, बागमती, गण्डकी र सुदूरपश्चिम प्रदेशका साना नदीहरूमा बहाव अचानक बढ्न सक्ने जनाएको छ । यस्तै पर्सि कोशी, मधेस, बागमती र गण्डकी प्रदेशका साना नदी तथा खोलामा पनि बहाव बढ्ने सम्भावना रहेको छ ।

महाशाखाले नदी तटीय क्षेत्र तथा जोखिमयुक्त स्थानमा बसोबास गर्ने नागरिकलाई सतर्क रहन, आवश्यक सावधानी अपनाउन र मौसम तथा बाढीसम्बन्धी सूचनामा ध्यान दिन आग्रह गरेको छ ।

Facebook Comments Box