आलुको बोराभित्र लुकाइएको खैरो हेरोइनसहित तीन जना पक्राउ

काठमाडौँ । सिन्धुलीको भिमानबाट स्कर्टिङ गर्दै काठमाडौँतर्फ ल्याइँदै गरेको ठूलो परिमाणको खैरो हेरोइनसहित प्रहरीले तीन जनालाई पक्राउ गरेको छ।
लागुऔषध नियन्त्रण ब्यूरो, बर्दिबास शाखाबाट खटिएको विशेष टोलीले मंगलबार महोत्तरीबाट काठमाडौँ आउँदै गरेको हाइस माइक्रो र त्यसलाई स्कर्टिङ गरिरहेको मोटरसाइकल नियन्त्रणमा लिँदै उनीहरूलाई पक्राउ गरेको हो।
प्रहरीका अनुसार मधेस प्रदेश ०५–००१ ज ००८६ नम्बरको हाइस माइक्रोमा आलुको बोराभित्र लुकाएर खैरो हेरोइन काठमाडौं पठाउने योजना बनाइएको थियो। उक्त माइक्रोलाई मोटरसाइकलमा सवार दुई जनाले अगाडि–पछाडि रहेर स्कर्टिङ गर्दै आएको अवस्थामा प्रहरीले नियन्त्रणमा लिएको हो।
पक्राउ पर्नेमा सिरहाको मिर्चैया नगरपालिका–५ का २० वर्षीय सन्देश यादव, धनुषाको कमला नगरपालिका–७ का २० वर्षीय राहुल कुमार मण्डल र सिरहाको कल्याणपुर नगरपालिका–६ का २० वर्षीय अभिषेक कुमार साह रहेका छन्।
लागुऔषध नियन्त्रण ब्यूरोका प्रहरी उपरीक्षक (एसपी) दुर्गाराज रेग्मीका अनुसार माइक्रोमा सवार यादवको साथबाट ४५ ग्राम १९० मिलिग्राम खैरो हेरोइन बरामद गरिएको छ।
प्रहरीले पक्राउ परेका तीनै जनालाई थप अनुसन्धान तथा कानुनी कारबाहीका लागि इलाका प्रहरी कार्यालय भिमानमा बुझाएको जनाएको छ।
लागुऔषध ओसारपसार नियन्त्रणका लागि प्रहरीले राजमार्ग तथा संवेदनशील नाकाहरूमा निगरानी बढाउँदै आएको छ। पछिल्लो घटनाले संगठित रूपमा हुने लागुऔषध कारोबार नियन्त्रणमा सुरक्षा निकायको सक्रियता थप प्रभावकारी बन्दै गएको देखाएको छ।

Facebook Comments Box