साउन २५ देखि ‘हामी सुन्छौँ’ अभियान सञ्चालन गर्ने रास्वपा घोषणा

काठमाडौं — राष्ट्रिय स्वतन्त्र पार्टी (रास्वपा)ले नागरिकका गुनासा, सुझाव र स्थानीय समस्या प्रत्यक्ष रूपमा सुन्न ‘हामी सुन्छौँ’ अभियान सञ्चालन गर्ने भएको छ।

पार्टीका सहमहामन्त्री हरि ढकालका अनुसार साउन १३ गते बसेको केन्द्रीय समितिको बैठकले अभियान सञ्चालन गर्ने निर्णय गरेको हो। अभियान साउन २५ गते (सोमबार)देखि पार्टीको केन्द्रीय कार्यालय ‘घण्टीघर’बाट सुरु हुनेछ।

रास्वपाले अभियानमार्फत नागरिकलाई पार्टी नेतृत्वसँग प्रत्यक्ष संवाद गर्ने अवसर प्रदान गरिने जनाएको छ। नागरिकले आफ्ना समस्या, गुनासा तथा सुझाव सिधै पार्टीसमक्ष राख्न सक्ने व्यवस्था मिलाइनेछ।

अभियानलाई प्रभावकारी बनाउन प्रत्येक दिन दुई जना केन्द्रीय सदस्य र एक जना प्रतिनिधिसभा सदस्य अनिवार्य रूपमा उपस्थित रहने व्यवस्था गरिएको पार्टीले जनाएको छ। उनीहरूले नागरिकका गुनासा सुन्ने, आवश्यक सहजीकरण गर्ने तथा सम्बन्धित विषयलाई पार्टीभित्र छलफलका लागि लैजाने जिम्मेवारी निर्वाह गर्नेछन्।

रास्वपाले जनतासँगको प्रत्यक्ष संवादलाई थप मजबुत बनाउने उद्देश्यका साथ यो अभियान सञ्चालन गर्न लागेको जनाएको छ।

Facebook Comments Box