दुई महिनामै सरकारको ढुकुटीमा १ खर्ब ८३ अर्ब राजस्व, गत वर्षभन्दा २५ अर्ब बढी

काठमाडौं । चालु आर्थिक वर्षको पहिलो दुई महिनामै सरकारले १ खर्ब ८३ अर्ब रुपैयाँभन्दा बढी राजस्व संकलन गरेको छ। भदौ मसान्तसम्म सरकारले १ खर्ब ८३ अर्ब २१ करोड रुपैयाँ राजस्व संकलन गरेको हो।
गत आर्थिक वर्षको सोही अवधिमा सरकारले १ खर्ब ५७ अर्ब ५३ करोड रुपैयाँ राजस्व उठाएको थियो। यस वर्षको राजस्व संकलन गत वर्षको तुलनामा २५ अर्ब ६७ करोड रुपैयाँले बढी हो।
सरकारले चालु आर्थिक वर्षमा कुल १५ खर्ब ८० अर्ब ३२ करोड रुपैयाँ राजस्व संकलन गर्ने लक्ष्य राखेको छ। भदौ मसान्तसम्मको संकलन वार्षिक लक्ष्यको ११.५९ प्रतिशत हो।
संकलित राजस्वमध्ये १ खर्ब ७२ अर्ब ४३ करोड रुपैयाँ कर राजस्व रहेको छ भने १० अर्ब ७८ करोड रुपैयाँ गैरकर राजस्वबाट प्राप्त भएको छ।
यस्तै, अनुदान तथा अन्य प्राप्तिसमेत जोड्दा भदौ मसान्तसम्म सरकारको कुल प्राप्ति १ खर्ब ८४ अर्ब ५८ करोड रुपैयाँ पुगेको छ। गत आर्थिक वर्षको सोही अवधिमा कुल सरकारी प्राप्ति १ खर्ब ५९ अर्ब ९९ करोड रुपैयाँ रहेको थियो।
यस आधारमा राजस्वसँगै सरकारको कुल आम्दानीसमेत अघिल्लो आर्थिक वर्षको तुलनामा बढेको देखिन्छ। यद्यपि, सरकारले राखेको वार्षिक राजस्व लक्ष्यको ठूलो हिस्सा आगामी महिनामा संकलन गर्नुपर्ने भएकाले आर्थिक गतिविधि, आयात–निर्यात, उपभोगको अवस्था तथा कर प्रशासनको प्रभावकारिताले आगामी राजस्व संकलनको गति निर्धारण गर्ने देखिन्छ।

Facebook Comments Box