शिक्षक सरुवा व्यवस्थापनमा कडाइ : मन्त्रालयद्वारा ३ बुँदे निर्देशन जारी

काठमाडौँ । शिक्षा, विज्ञान तथा प्रविधि मन्त्रालय अन्तर्गतको शिक्षा तथा मानव स्रोत विकास केन्द्र, शिक्षक व्यवस्थापन समन्वय महाशाखा भक्तपुरले शिक्षक सरुवा व्यवस्थापनसम्बन्धी ३ बुँदे कडाइ निर्देशन जारी गरेको छ ।

महाशाखाले देशभरका सबै स्थानीय तहलाई सोमबार पत्राचार गर्दै स्थायी पदपूर्तिका लागि शिक्षक सेवा आयोगमा माग गरिएको पदमा जिल्लान्तर वा अन्तर–स्थानीय तह सरुवा गरी पदपूर्ति नगर्न स्पष्ट निर्देशन दिएको छ ।

त्यस्तै, सम्बन्धित स्थानीय तहमा खुद पुल दरबन्दी रहेका अवस्थामा सोही दरबन्दीमा मात्रै शिक्षक सरुवा गर्नुपर्ने व्यवस्था कडाइका साथ पालना गर्न भनिएको छ ।

यसैगरी, ७५ प्रतिशत कार्यसम्पादन मूल्याङ्कनका आधारमा बढुवाका लागि निवेदन दिएका सम्भाव्य उम्मेदवारहरूको हकमा बढुवाको अन्तिम नतिजा प्राप्त नभएसम्म सरुवा सहमति नदिन पनि स्थानीय तहहरूलाई निर्देशन दिइएको छ ।

महाशाखाले शिक्षक व्यवस्थापनलाई पारदर्शी, व्यवस्थित र आयोगमार्फत हुने स्थायी पदपूर्तिलाई असर नपर्ने गरी कार्यान्वयन गर्न सबै स्थानीय तहलाई आग्रह गरेको छ ।

Facebook Comments Box