बजारमा नक्कली औषधि भेटिएपछि ६६ फार्मेसीमा अनुगमन, एक पसल बन्द गरी अनुसन्धान सुरु

काठमाडौं । ‘सेरोफ्लो रोटाक्याप्स २५०’ नामक नक्कली औषधि बजारमा भेटिएपछि स्वास्थ्य तथा खाद्य स्वच्छता मन्त्रालयले औषधि बजार अनुगमनलाई तीव्र बनाएको छ।

मन्त्री निशा मेहताको निर्देशनमा बिदाको दिनसमेत सञ्चालन गरिएको अनुगमनका क्रममा काठमाडौं उपत्यका र आसपासका क्षेत्रमा रहेका ६६ वटा फार्मेसी निरीक्षण गरिएको छ।

औषधि व्यवस्था विभागका अनुसार बनेपास्थित एक औषधि पसलबाट उक्त नक्कली औषधि २१ थान बरामद भएको छ। सो पसललाई तत्काल बन्द गरी थप अनुसन्धान अघि बढाइएको छ।

अनुगमनका क्रममा नवीकरण नगरी सञ्चालन भएका, म्याद गुज्रिएका औषधि बिक्री गर्ने, फार्मासिस्टबिनै औषधि बिक्री गर्ने तथा मापदण्ड नपुगेका १५ भन्दा बढी फार्मेसीलाई कारबाहीका लागि विभागमा उपस्थित हुन निर्देशन दिइएको छ।

विभागले नक्कली औषधिको भण्डारण, आपूर्ति र बिक्री वितरणमा संलग्न व्यक्ति तथा संस्थाको पहिचान गरी कानुनी कारबाही अघि बढाइने जनाएको छ। साथै, सर्वसाधारणलाई आधिकारिक फार्मेसीबाट मात्र औषधि खरिद गर्न आग्रह गरिएको छ।

Facebook Comments Box