ठक्करपछि शव बोकेर भागिरहेका भारतीय पक्राउ, एक फरार

सप्तरी । सप्तरीमा एक किशोरको मृत्यु भएपछि शव मोटरसाइकलमा राखेर भागिरहेका एक भारतीय नागरिकलाई प्रहरीले पक्राउ गरेको छ। घटनामा संलग्न अर्का एक व्यक्ति भने फरार रहेका छन्। प्रारम्भिक अनुसन्धानअनुसार बुधबार शम्भुनाथ नगरपालिका–६ कठौना बजारमा ठक्कर दिई १४ वर्षीय मोहम्मद सादिकको मृत्यु भएपछि शव मोटरसाइकलमा राखेर भाग्ने प्रयास गरिएको थियो।

जिल्ला प्रहरी कार्यालय सप्तरीका अनुसार प्रहरी चौकी बिसनपुरबाट खटिएको टोलीले शंकास्पद मोटरसाइकल पछ्याउँदा बीआर–३२ बी–९७६४ नम्बरको अपाचे मोटरसाइकलमा सवार दुई जनाले दुर्घटनास्थलबाट करिब ११ किलोमिटर टाढा खडक नगरपालिका–१ स्थित दिनाभद्री थान नजिक शव फालेर भाग्न खोजेका थिए। स्थानीयको सहयोगमा भारतको मधुवनी जिल्ला, पिपराहीका २८ वर्षीय मो. सादर नट पक्राउ परेका छन् भने अर्का व्यक्ति फरार छन्।

प्रहरीका अनुसार घटना दुर्घटना हो वा अन्य कुनै आपराधिक घटना भन्ने विषयमा विस्तृत अनुसन्धान भइरहेको छ। पक्राउ परेका व्यक्ति बोदेबरसाईन नगरपालिका–५ स्थित एक मासु पसलमा काम गर्ने गरेको प्रारम्भिक जानकारी छ। घटनापछि आक्रोशित स्थानीय र मृतकका आफन्तले बिहीबार बिहान पूर्व–पश्चिम राजमार्ग अन्तर्गत कठौनामा करिब ३० मिनेट सडक अवरुद्ध गरेका थिए।

Facebook Comments Box