आज गुरु पूर्णिमा तथा व्यास जयन्ती, गुरुप्रति श्रद्धा प्रकट गर्दै देशभर विभिन्न कार्यक्रम

काठमाडौं । असार शुक्ल पूर्णिमाका अवसरमा आज गुरु पूर्णिमा तथा व्यास जयन्ती देशभर श्रद्धा र सम्मानका साथ मनाइँदैछ। यस दिन शिक्षा, दीक्षा र ज्ञान प्रदान गर्ने गुरुजनप्रति सम्मान व्यक्त गर्दै विभिन्न विद्यालय, धार्मिक संस्था तथा सङ्घ–संस्थाले विशेष कार्यक्रम आयोजना गरेका छन्।

धर्मशास्त्रअनुसार ‘गु’ को अर्थ अन्धकार र ‘रु’ को अर्थ प्रकाश हो। अज्ञानरूपी अन्धकार हटाई ज्ञानरूपी प्रकाश प्रदान गर्ने व्यक्तिलाई गुरु मानिन्छ। शास्त्रमा गुरुलाई ब्रह्मा, विष्णु र महेश्वरको स्वरूपका रूपमा वर्णन गरिएको छ र ‘आचार्यदेवो भव’ भन्ने मान्यता प्रचलित छ।

आजकै दिन वेदलाई ऋग्वेद, यजुर्वेद, सामवेद र अथर्ववेद गरी चार भागमा विभाजन गर्ने तथा १८ पुराण, १८ उपपुराण र महाभारतका रचनाकार महर्षि वेदव्यासको जन्मजयन्ती अर्थात् व्यास जयन्ती पनि मनाइन्छ।

यस अवसरमा नेपाल महर्षि वैदिक फाउन्डेसनले काठमाडौंस्थित चम्पादेवी ब्रह्मानन्द सरस्वती ग्राममा गुरु पूर्णिमा विशेष कार्यक्रम आयोजना गरेको छ।

Facebook Comments Box