सुनसरी घटनाबारे प्रधानमन्त्री शाहद्वारा सुरक्षा प्रमुखसँग ब्रिफिङ, शान्ति–सुरक्षा कायम राख्न उच्च सतर्कताको निर्देशन

काठमाडौं । प्रधानमन्त्री वालेन्द्र शाहले सुनसरी घटनापछि विकसित शान्ति–सुरक्षाको अवस्थाबारे सुरक्षा निकायका प्रमुखहरूसँग विस्तृत ब्रिफिङ लिएका छन्।

प्रधानमन्त्री तथा मन्त्रिपरिषद्को कार्यालयमा गृहमन्त्री सुधन गुरुङको उपस्थितिमा भएको भेटवार्तामा प्रधानमन्त्री शाहले नेपाल प्रहरीका प्रहरी महानिरीक्षक दानबहादुर कार्की तथा सशस्त्र प्रहरी बल, नेपालका प्रहरी महानिरीक्षक नारायणदत्त पौडेलसँग छुट्टाछुट्टै छलफल गरेका हुन्।

प्रधानमन्त्रीको सचिवालयका अनुसार भेटका क्रममा सुनसरीको पछिल्लो सुरक्षा अवस्था, आन्दोलनको प्रभाव, सम्भावित सुरक्षा चुनौती तथा जोखिमबारे विस्तृत जानकारी गराइएको थियो।

ब्रिफिङपछि प्रधानमन्त्री शाहले सुनसरीको परिस्थिति तत्काल नियन्त्रणमा लिन, आमनागरिकको जिउधनको सुरक्षा सुनिश्चित गर्न तथा सामाजिक सद्भाव बिथोल्न खोज्ने तत्वमाथि कडा निगरानी राख्न सुरक्षा निकायलाई निर्देशन दिएका छन्।

उनले शान्ति–सुरक्षा कायम राख्ने विषयमा कुनै पनि किसिमको सम्झौता नगर्न र गृह मन्त्रालयअन्तर्गतका नेपाल प्रहरी तथा सशस्त्र प्रहरी बललाई उच्च सतर्कताका साथ प्रभावकारी रूपमा परिचालन गर्न समेत निर्देशन दिएका छन्।

Facebook Comments Box