गृहमन्त्री गुरुङलाई सांसद पाण्डेको जवाफ– ‘हामी राजनीति सिकाउन होइन, सेवा गर्न आएका हौं’

काठमाडौं । राष्ट्रिय स्वतन्त्र पार्टी (रास्वपा) का सांसद राजु पाण्डेले गृहमन्त्री सुधन गुरुङको पछिल्लो अभिव्यक्तिप्रति प्रतिक्रिया जनाउँदै आफूहरू राजनीति सिकाउन नभई जनताको सेवा गर्न आएको बताएका छन् ।
सांसद पाण्डेले सामाजिक सञ्जालमार्फत संक्षिप्त प्रतिक्रिया दिँदै लेखेका छन्, ‘हामी राजनीति सिकाउन होइन, सेवा गर्न आएका हौं।’
जेनजी सहिद दिवसका अवसरमा आयोजित कार्यक्रममा गृहमन्त्री गुरुङले आफूहरू ‘राजनीति सिकाउन आएको’ अभिव्यक्ति दिएका थिए । गृहमन्त्रीको उक्त भनाइ सार्वजनिक भएपछि सांसद पाण्डेले सामाजिक सञ्जालमार्फत त्यसको जवाफ दिएका हुन् ।
पाण्डेको अभिव्यक्तिले नयाँ पुस्ताको राजनीतिक सहभागिता र राजनीतिको उद्देश्यबारे दुई फरक दृष्टिकोणबीचको बहसलाई थप सतहमा ल्याएको देखिन्छ । उनले आफ्नो संक्षिप्त प्रतिक्रियामार्फत राजनीति पद, प्रभाव वा अरूलाई पाठ सिकाउने माध्यम नभई जनताको सेवा गर्ने जिम्मेवारी भएको सन्देश दिन खोजेका छन् ।
गृहमन्त्री गुरुङको अभिव्यक्तिलाई लक्षित गर्दै आएको पाण्डेको यो टिप्पणीलाई रास्वपाभित्रैबाट सरकारको कार्यशैली र राजनीतिक दृष्टिकोणप्रति उठाइएको संकेतका रूपमा समेत हेरिएको छ ।
यद्यपि, सांसद पाण्डेले गृहमन्त्रीको नाम उल्लेख नगरी आफूहरूको राजनीतिक उद्देश्य ‘सेवा’ रहेको स्पष्ट गरेका छन् । पछिल्लो समय सरकारका मन्त्री तथा सत्तारूढ दलका नेताहरूका अभिव्यक्तिलाई लिएर राजनीतिक वृत्तमा बहस बढिरहेका बेला पाण्डेको यो टिप्पणी पनि चर्चामा आएको हो ।

Facebook Comments Box