लगातार वर्षापछि कान्ति लोकपथका तीन स्थानमा पहिरो, यातायात सेवा प्रभावित

मकवानपुर । लगातार भइरहेको वर्षाका कारण कान्ति लोकपथका विभिन्न स्थानमा पहिरो खस्दा हेटौँडाबाट उक्त मार्ग हुँदै सञ्चालन हुने यातायात सेवा प्रभावित भएको छ ।

कान्ति लोकपथअन्तर्गत ललितपुरतर्फका तीन स्थानमा पहिरो खसेपछि सडक अवरुद्ध भएको मकवानपुरका प्रहरी प्रमुख श्यामबहादुर खत्रीले जानकारी दिएका छन् ।

पहिरोका कारण सडकमा सवारीसाधनको आवागमन प्रभावित बनेको छ । वर्षा निरन्तर भइरहेकाले थप पहिरो खस्न सक्ने सम्भावनालाई ध्यानमा राख्दै यात्रु तथा चालकलाई सावधानी अपनाउन प्रहरीले आग्रह गरेको छ ।

यसैबीच, लगातारको वर्षाका कारण जलाशयमा पानीको सतह बढ्न सक्ने भए पनि कुलेखानी जलविद्युत् आयोजनाको जलाशयमा हाल पानीको सतह सामान्य अवस्थामा रहेको प्रहरी प्रमुख खत्रीले जानकारी दिए ।

सडक खुलाउन सम्बन्धित निकायसँग समन्वय भइरहेको जनाइएको छ । वर्षाको अवस्था र पहिरोको जोखिमलाई ध्यानमा राख्दै अत्यावश्यकबाहेक यात्रा नगर्न तथा सडकको अवस्थाबारे जानकारी लिएर मात्र यात्रा गर्न आग्रह गरिएको छ।

Facebook Comments Box