जबरालाई भेट्न आयोगको टोली रोकिएपछि एसएसपी खड्कालाई मंगलबार बयानका लागि बोलाइयो

काठमाडौं । पूर्वप्रधानन्यायाधीश चोलेन्द्रशमशेर जबरा हिरासतमा रहेका बेला राष्ट्रिय मानव अधिकार आयोगको अनुगमन टोलीलाई भेट्न नदिएको घटनाले गम्भीर प्रश्न उठाएको छ। आयोगले घटनालाई गम्भीरतापूर्वक लिँदै उपत्यका अपराध अनुसन्धान कार्यालय, टेकुका प्रमुख प्रहरी वरिष्ठ उपरीक्षक (एसएसपी) सन्तोष खड्कालाई मंगलबार बयानका लागि बोलाएको छ।

आयोगले सोमबार पत्राचार गर्दै एसएसपी खड्कालाई असोज १३ गते मंगलबार आयोगमा उपस्थित भएर घटनाबारे स्पष्टिकरण दिन निर्देशन दिएको हो। हिरासतमा रहेका व्यक्तिको मानव अधिकारको अवस्था अनुगमन तथा निरीक्षण गर्ने क्रममा आयोगको टोलीलाई प्रवेशमै रोकिएको विषयमा खड्कासँग जवाफ मागिने आयोगले जनाएको छ।

आइतबार आयोगका सदस्य मनोज दुवाडीसहित तीन सदस्यीय टोली जबरालाई भेट्न तथा हिरासतको अवस्थाबारे अनुगमन गर्न उपत्यका अपराध अनुसन्धान कार्यालय पुगेको थियो। तर प्रहरीले टोलीलाई जबरासँग भेट्न अनुमति नदिएपछि आयोगको टोली त्यसै फर्किनुपरेको थियो।

आयोगको संवैधानिक तथा कानुनी भूमिकाअनुसार हिरासतमा रहेका व्यक्तिको मानव अधिकारको अवस्था अनुगमन गर्ने क्रममा सरकारी निकायबाटै अवरोध सिर्जना भएको घटनाले प्रहरीको कार्यशैलीमाथि प्रश्न उठेको छ। आयोगले यही विषयमा प्रहरीसँग औपचारिक जवाफ मागेको हो।

यसअघि आइतबार बिहान उपत्यका अपराध अनुसन्धान कार्यालयको टोलीले सुरक्षा जोखिम रहेको कारण देखाउँदै पूर्वप्रधानन्यायाधीश जबरालाई महाराजगञ्जस्थित निवासबाट नियन्त्रणमा लिएको थियो। नियन्त्रणमा लिएपछि उनलाई हिरासतमा राखिएको र त्यसक्रममा मानव अधिकारको अवस्था तथा भेटघाटको व्यवस्थालाई लिएर विभिन्न पक्षबाट चासो व्यक्त हुँदै आएको छ।

आयोगको टोलीलाई नै हिरासतमा रहेका जबरासँग भेट्न नदिइएको घटनाले प्रहरीको हिरासत व्यवस्थापन र मानव अधिकारसम्बन्धी दायित्वमाथि थप प्रश्न खडा गरेको छ। मंगलबार एसएसपी खड्काको बयानपछि आयोगले घटनामा प्रहरीको निर्णय, आदेश र त्यसको कानुनी आधारबारे थप तथ्य बाहिर ल्याउने अपेक्षा गरिएको छ।

Facebook Comments Box