हस्तकला क्षेत्रको विकासबारे महासंघका पदाधिकारीसँग प्रधानमन्त्री बालेनको छलफल

काठमाडौं । प्रधानमन्त्री बालेन्द्र शाह ‘बालेन’ले आज नेपाल हस्तकला महासंघका पदाधिकारी तथा प्रतिनिधिहरूसँग हस्तकला क्षेत्रको विकास, प्रवर्द्धन र निर्यात विस्तारका विषयमा छलफल गरेका छन्।

प्रधानमन्त्री तथा मन्त्रिपरिषद्को कार्यालय, सिंहदरबारमा भएको छलफलमा हस्तकला उद्योगको वर्तमान अवस्था, उत्पादन वृद्धि, बजार विस्तार, निर्यात प्रवर्द्धन तथा क्षेत्रले भोगिरहेका समस्या र तिनको समाधानका उपायबारे विचार–विमर्श भएको जनाइएको छ।

बैठकमा नेपाल हस्तकला महासंघका अध्यक्ष रविन्द्र शाक्य, वरिष्ठ उपाध्यक्ष राजमान बज्राचार्य, उपाध्यक्ष किरणकुमार स्थापित, सल्लाहकार विकासरत्न ढाक्वा तथा निर्यातकर्ता महेश्वर श्रेष्ठ सहभागी थिए।

प्रधानमन्त्रीको सचिवालयका अनुसार सरकार र निजी क्षेत्रबीचको सहकार्यलाई प्रभावकारी बनाउँदै नेपाली हस्तकलाको राष्ट्रिय तथा अन्तर्राष्ट्रिय बजार विस्तारका लागि आवश्यक नीतिगत सहयोगबारे पनि छलफल भएको छ।

प्रधानमन्त्री शाहले पछिल्लो समय उद्योग, व्यवसाय, पुँजी बजार, पर्यटन, ऊर्जा तथा विभिन्न निजी क्षेत्रका सरोकारवालासँग नियमित संवाद गर्दै नीतिगत सुधार र समस्या समाधानका विषयमा छलफललाई निरन्तरता दिँदै आएका छन्।

Facebook Comments Box