आईजीपी दानबहादुर कार्कीको प्रमुख आतिथ्यतामा मेट्रो ट्राफिक एफ.एम.को १४औँ वार्षिकोत्सव सम्पन्न

काठमाडौं । नेपाल प्रहरीका महानिरीक्षक (आईजीपी) दानबहादुर कार्कीको प्रमुख आतिथ्यतामा मेट्रो ट्राफिक एफ.एम. ९५.५ मेगाहर्जको १४औँ वार्षिकोत्सव कार्यक्रम सम्पन्न भएको छ ।

कार्यक्रमलाई सम्बोधन गर्दै आईजीपी कार्कीले ट्राफिक व्यवस्थापन, सडक सुरक्षा र जनचेतना अभिवृद्धिमा सञ्चारमाध्यमको महत्वपूर्ण भूमिका रहेको उल्लेख गर्नुभयो । उहाँले सवारी दुर्घटना न्यूनीकरणका लागि नियमको पालना र जिम्मेवार नागरिक व्यवहार आवश्यक रहेको बताउनुभयो ।

वार्षिकोत्सवका अवसरमा आईजीपी कार्कीले मेट्रो ट्राफिक एफ.एम.लाई सहयोग गर्ने विभिन्न संघसंस्था, विज्ञापनदाता तथा उत्कृष्ट सवारी चालकहरूलाई कदरपत्र प्रदान गर्नुभयो ।

सोही अवसरमा ट्राफिक जनचेतनामूलक गीत “असल नागरिकलाई सिकाउनै पर्दैन” को समेत विमोचन गरिएको थियो । उक्त गीतले सडक अनुशासन, ट्राफिक नियमको पालना र जिम्मेवार नागरिक बन्न प्रेरित गर्ने उद्देश्य राखेको छ ।

मेट्रो ट्राफिक एफ.एम.ले स्थापनाकालदेखि नै ट्राफिक नियम, सडक सुरक्षा र जनचेतना फैलाउने कार्यमा महत्वपूर्ण योगदान पुर्‍याउँदै आएको छ । कार्यक्रममा नेपाल प्रहरीका उच्च अधिकृत, ट्राफिक प्रहरी अधिकारी, सञ्चारकर्मी तथा विभिन्न क्षेत्रका व्यक्तिहरूको सहभागिता रहेको थियो ।

Facebook Comments Box