बागलुङमा बाढीपहिरोको वितण्डा : मृत्यु हुनेको संख्या १२ पुग्यो, एक बेपत्ता

बागलुङ । बागलुङमा पछिल्लो तीन दिनयता परेको अविरल वर्षापछि आएको बाढीपहिरोमा परी मृत्यु हुनेको संख्या १२ पुगेको छ । जिल्लाका विभिन्न स्थानमा पहिरोले घर पुरिँदा १२ जनाको मृत्यु भएको छ भने एक जना अझै बेपत्ता छन् ।

ताराखोला गाउँपालिका–५ सिपमा पहिरोले घर पुरिँदा दुई जनाको मृत्यु भएको जिल्ला प्रहरी कार्यालय बागलुङले जनाएको छ । मृत्यु हुनेमा ५५ वर्षीय दिलबहादुर पुन र उनकी सासु म्याग्दीको मालिका गाउँपालिका–२ की ७९ वर्षीया नरमाया रोका रहेका छन् ।

पहिरोमा परी पुनकी श्रीमती, दुई छोरा र बुहारी सामान्य घाइते भएका छन् । उनीहरूको स्थानीय स्वास्थ्य संस्थामा उपचार भइरहेको प्रहरीले जनाएको छ ।

लगातारको वर्षापछि जिल्लाका विभिन्न स्थानमा बाढी तथा पहिरोले जनधनमा ठूलो क्षति पुर्‍याएको छ । शनिबार ताराखोलामै एक जनाको मृत्यु भएको थियो । आइतबार तमानखोला गाउँपालिकामा चार जनाको मृत्यु भएको थियो भने एक जना बेपत्ता भएका थिए ।

त्यस्तै, निसीखोला गाउँपालिकामा पाँच जनाको मृत्यु भएको प्रहरीले जनाएको छ । पछिल्लो घटनासहित बागलुङमा बाढीपहिरोमा परी मृत्यु हुनेको संख्या १२ पुगेको हो ।

प्रहरी र स्थानीयवासीले प्रभावित क्षेत्रमा उद्धार तथा खोजी कार्य जारी राखेका छन् । लगातारको वर्षाका कारण जिल्लाका विभिन्न स्थानमा पहिरोको जोखिम कायमै रहेकाले स्थानीय प्रशासनले सर्वसाधारणलाई सतर्क रहन आग्रह गरेको छ ।

Facebook Comments Box