दैलेखमा बिरामी बोकेको बलेरो २०० मिटर तल खस्यो, चालकसहित ६ जना घाइते

दैलेख । दैलेखमा बिरामीलाई अक्सिजनसहित उपचारका लागि सुर्खेततर्फ लैजाँदै गरेको बलेरो गाडी दुर्घटनामा पर्दा चालकसहित ६ जना घाइते भएका छन् ।

सोमबार बिहान गुराँस गाउँपालिका–१ काफलतोलीस्थित कर्णाली राजमार्गमा कर्णाली प्रदेश ०२–००१ च १२१५ नम्बरको बलेरो सडकबाट करिब २०० मिटर तल खसेर दुर्घटना भएको हो ।

प्रहरीका अनुसार कालिकोटबाट बिरामीलाई अक्सिजनसहित उपचारका लागि सुर्खेत लैजाने क्रममा गाडी दुर्घटनामा परेको हो । उक्त बलेरो कालिकोटको सान्नीत्रिवेणी गाउँपालिका–७ निवासी २२ वर्षीय योगेश सिंखडाले चलाएका थिए ।

दुर्घटनामा चालक सिंखडासहित ६ जना घाइते भएका छन् । घाइते हुनेमा १८ वर्षीय गंग शार्की, २१ वर्षीय तपेन्द्र सिंखडा, ३६ वर्षीया जादुकाल सार्की, ४१ वर्षीय रने शार्की र २७ वर्षीया कैसी सार्की रहेका छन् । कैसी बिरामी हुन् ।

प्रहरीका अनुसार चालक सिंखडाको शरीरका विभिन्न भागमा चोट लागेको छ भने उनको अवस्था गम्भीर रहेको छ । अन्य घाइतेको पनि शरीरका विभिन्न भागमा चोट लागेको जनाइएको छ ।

दुर्घटनामा घाइते भएका सबैलाई थप उपचारका लागि सुर्खेत पठाइएको प्रहरीले जनाएको छ । दुर्घटनाको कारणबारे थप अनुसन्धान भइरहेको प्रहरीले जानकारी दिएको छ ।

Facebook Comments Box